Hay’adda Caafimaadka Adduunka (WHO) ayaa sheegtay inay kordhinayso dadaallada lagu caawinayo Soomaaliya si loo helo adeegyo caafimaadka oo tayo leh.
Bayaan ay WHO soo saartay oo lagu xusayey maalinta caafimaadka dhimirka ee adduunka oo ku beegan Talaadada, ayaa xustay in ay kordhin doonto tababarrada xirfadlayaasha caafimaadka si ay gacan uga geystaan sidii caafimaadka dhimirka loogu dari lahaa daryeelka caafimaadka aasaasiga ah ee dalka.
Tallaabo deg-deg ah ayaa loo qaadayaa si loo hubiyo in qof walba uu ku dhaqmo xuquuqdiisa bini’aadannimo iyo inuu helo daryeelka caafimaadka dhimirka ee tayada leh ee uu u baahan yahay, WHO ayaa tiri, iyadoo ku nuuxnuuxsatay in taageerada la siiyo hay’adaha caafimaadka Soomaaliya ay xaqiijisey in caafimaadka dhimirka la qiimeeyo, korna loo qaado, lana ilaaliyo.
WHO waxa ay sheegtay in Soomaaliya ay si gaar ah u saameeyeen caqabadaha caafimaadka dhimirka oo ay ugu wacan tahay colaadaha daba dheeraaday , kuwaas oo si ba’an u burburiyay wada-noolaanshaha bulshada, burburiyay hab-nololeedkii bulshada, taasoo keentay in ku dhawaad saddexdii qof ee Soomaalida ah mid ka mid ah uu la kulmo nooc ka mid ah xaaladaha caafimaadka dhimirka.
Bilihii June iyo July, WHO waxa ay Wasaaradda Caafimaadka Soomaaliya ku taageertay in 50 xirfadlayaal caafimaad ah ay ku tababarto isbitaallo ku yaalla gobollada Xudur, Koonfur Galbeed iyo Dhuusamareeb, Galmudug.
HBN NEWS DESK