Hay’adda Qaramada Midoobay u qaabilsan Cunnada Adduunka ee WFP ayaa bilowday inay cunto u qaybiso ku dhawaad 900,000 oo Qaxooti ah oo ku sugan dalka Itoobiya, ka dib markii ay hakad ku jirtay, sababo la xiriiro leexsashada cuntada gargaarka ah.
Qoysaska ku jira xeryaha qaxootiga ee shan gobol oo ay ku jiraan dad dhawaan ka soo barakacay Suudaan ayaa helaya xirmooyin cunto markii ugu horreysay tan iyo markii WFP ay joojisay cunto qaybin bishii Juun 2023, ayay WFP ku sheegtay hadal ay soo saartay.
Bishii Juun, WFP waxay hakisay barnaamijkeedii gargaarka cuntada ee dalka ku yaal Bariga Afrika, iyadoo ku sababaysay wax aan la aqbali karin kadib luminta cuntada gargaarka ah, iyo leexsashada.
WFP waxa ay sheegtay in dib u soo celinta cuntada gargaarka ee qaxootiga Itoobiya ay daba socoto dib u habayn buuxda oo lagu sameeyay ilaalinta iyo xakamaynta qaxootiga.
Sida lagu sheegay bayaanka, ku dhawaad 35,000 oo qof oo ka qaxay Suudaan una qaxay Itoobiya lixdii bilood ee la soo dhaafay ayaa u baahan cunto gargaar degdeg ah, halka Itoobiya ay sidoo kale martigelisay 850,000 oo kale oo qaxooti ah oo u badan Somalia, South Sudan iyo Eritrea.
Iyadoo xustay in dib u soo celinta gargaarka cuntada ee qaxootiga ay tahay mid muhiim ah, WFP waxay sheegtay in xogtii ugu dambeysay ee gaajada ay muujineyso in haqab-beelka cuntada qaxootigu uu xumaaday bilihii lasoo dhaafay, taasoo keentay nafaqo-xumo korortay, xiisadda ka taagan xeryaha iyo xitaa safarro aan ammaan ahayn oo looga gudbayo xadka.
HBN NEWS DESK