Gobolka gooni u goosadka ah ee Nagorno-Karabakh ayaa sheegay in ugu yaraan 20 qof ay ku dhinteen ku dhawaad 300 oo kalena ay ku dhaawacmeen qarax ka dhacay kaalin shidaal, iyadoo dadka doonayay inay u qaxaan Armenia ay saf ugu jireen gaaska.
Waaxda caafimaadka ee gobolka gooni u goosadka ah ayaa sheegay in 13 meyd ah la helay 7 qofna ay ku dhinteen qaraxii ka dhacay kaalin shidaal oo ku taal duleedka caasimadda gobolka Stepanakert galinkii dambe ee Isniintii.
Waxay sheegtay in 290 qof la jiifiyay isbitaal, qaar badan oo ka mid ahna ay xaaladoodu liidato.
Qaraxan ayaa dhacay xilli dadka deegaanka ay saf ugu jireen sidii ay shidaal ugu heli lahaayeen baabuurtooda oo ka bixi lahaa gobolka. Kumanaan kun oo qof oo ka soo jeeda Nagorno-Karabakh ayaa u qaxaya Armenia ka dib howlgallada militari ee Asarbayjan ay ku doonayaan inay si buuxda ugu soo ceshadaan gobolka ka dib saddex iyo toban sano oo gooni u goosad ahay.
Milatariga Asarbayjaan ayaa 24 saacadood ku burburiyay ciidamada Armenia usbuucii hore, taas oo ku qasabtay mas’uuliyiinta gooni u goosadka inay ogolaadaan inay hubka dhigaan oo ay bilaabaan wadahadal ku saabsan “ku soo laabashada” Nagorno-Karabakh Asarbayjan. Halka Asarbayjan ay balan qaaday inay ixtiraami doonto xuquuqda dadka ka soo jeeda Armenia ee ku nool gobolka oo ay soo celin doonto sahayda kadib 10 bilood oo go’doomin ah, dad badan oo deegaanka ah ayaa ka baqaya aargoosi waxayna go’aansadeen inay u dhoofaan Armenia.
Dowladda Armenia ayaa sheegtay in in ka badan 6,500 oo qof oo ka yimid Nagorno-Karabakh ay u qaxeen Armenia fiidnimadii Isniinta. Moscow waxay sheegtay in ciidamada nabad ilaalinta Ruushka ee ku sugan Nagorno-Karabakh ay gacan ka geysanayeen daadgureynta dadka.
Nagorno-Karabakh waxaa gacanta ku hayay ciidamada qowmiyadda Armenian, oo ay taageerayaan militariga Armenia, intii lagu jiray dagaalkii gooni u goosadka ee dhammaaday 1994.
HBN NEWS DESK