Golaha Ammaanka ee Qaramada Midoobay ayaa hakiyay muddo saddex bilood ah ka bixitaanka ciidamada Midowga Afrika ee Soomaaliya, halkaasoo ay ka socdaan dagaallo ay kula jiraan ururka Al-shabaab. Go’aankan ayaa daba socda codsi ka yimid dalka Geeska Afrika oo ku aadan in ciidamada ay sii joogaan dalka si ay gacan uga geystaan dagaalka ka dhanka ah Al-Shabaab.
Codsiga Soomaaliya waxaa taageeray Midowga Afrika, dhammaan dalalka ay ciidamada ka joogaan Soomaaliya iyo golaha, waxayna isku raaceen in muddo 90 maalmood ah dib loo dhigo ka bixitaanka ciidamada Midowga Afrika ee 19,000 oo askari.
Sanadkii la soo dhaafay ee April, goluhu wuxuu si aqlabiyad ah ku ansixiyay howlgalka cusub ee Midowga Afrika ee ku meel gaarka ah ee Soomaaliya, kaasoo loo yaqaan ATMIS, si ay u taageeraan Soomaalida ilaa ciidamadoodu ay si buuxda ula wareegayaan mas’uuliyadda amniga dalka dhammaadka 2024-ka.
ATMIS waxay beddeshay Hawlgalka Midowga Afrika ee Soomaaliya, ee loo yaqaanno AMISOM, kuwaas oo ku sugan Geeska Afrika muddo 15 sano ah oo ku sugnaa Soomaaliya, kuwaas oo caawinayay ciidamada dowladda.
HBN NEWS DESK