Mucaaradka Puntland ayaa soo bandhigay jadwalka doorashada guddoonka baarlamaanka iyo tan madaxweynaha ee soo socota, kaddib go’aamadii ka soo baxay golaha guurtida Isimada maamulkaas, isla markaana xooga saaraya in loo hogaansamo nidaamka doorashada ee ku saleysan qabiilka, warsaxaafadeedka mucaaradka ayaa faah faahin ka bixiyay qaabka ay u dhaceyso doorashada baarlamaanka.
Go’aanka mucaaradka ayay sheegeen in looga gol leeyahay in lagu fashiliyo isku dayga la sheegay in madaxweyne Deni uu ku doonayo inuu ku kordhiyo xafiiskiisa si sharci darro ah. Walaaca laga qabo in xiisad siyaasadeed ay ka dhalato ayaa sii xoogeysaneysa iyadoo 15-ka bishan uu furmayo wadatashiga bulshada ee ku aadan soo xulista xildhibaanada Puntland.
Tallaabadan ay qaadeen mucaaradka ayaa weji kale ku soo kordhinaysa khilaafka siyaasadeed ee ka taagan arrimaha doorashada Puntland. Waxaa xusid mudan in dhawaan guddiga doorashada Puntland ay shaaciyeen in jadwalka doorashada madaxweynaha iyo baarlamaanka si isku mid ah loo qaban doono 25-ka bisha Febraayo ee sanadka soo socda.
Madaxweyne Deni ayaa sheegay in ay ka go’an tahay in ay ku adkeystaan Jadwalka Doorashada, balse ficilada ay sameynayaan dhinacyada iska soo horjeeda ay muujineyso khilaafaadkooda siyaasadeed, taasi oo yareyneysa xiisada isa soo tareysa ee ku aadan xilliga doorashada loo qorsheeyay.
halkaan ka akhriso jadwalka ay soo saareen
