Hogaamiyaha maamulka SSC-Khaatumo Cabdulqaadir Axmed Aw-Cali Firdhiye ayaa sheegay in maamulkiisa cusub uusan ka qeyb gali doonin doorashada soo socota ee maamul goboleedka Puntland.
Mudane Firdhiye oo ka qeyb galay shirkii Madasha Heritage ee ka dhacay magaalada Muqdisho ayaa ku nuux nuuxsaday in shacabka ku nool deegaanada Sool, Sanaag iyo Cayn ee loo yaqaan SCC-Khaatumo iyo odayaashooda soo xuli jiray xubnaha maamulka Puntland, hadda la doortay, waxay isla garteen inay dhistaan maamul ay iyagu leeyihiin.
Firdhiye waxa uu intaa ku daray in cid kasta oo ka soo jeeda deegaanada SSC oo xil ka qabta gobol kale aanay matalin SCC-Khaatumo. Inkastoo madaxda sare ee SCC ay ku dhawaaqeen in ay ka go’een Somaliland horaantii sanadkan ka dib 8 bilood oo ay dagaalo ku dhexmareen ciidamada Somaliland iyo Khaatumo magaalada Laascaanood, ayaa hadana maamulka SCC iyo Khaatumo waxa ay wadaan olole ay ku doonayaan inay ku noqdaan maamul goboleed.
Deegaannada SSC-Khaatumo waxaa ku sugan 17 xildhibaan, madaxweyne ku xigeen, wasiiro, wasiir ku xigeeno iyo agaasimayaal guud oo ka tirsan maamul goboleedka Puntland.
Hadalka hogaamiyaha SSC-Khaatumo ayaa kusoo beegmaya xili Puntland ay isku diyaarinayso doorashada madaxtinimo ee fooda inagu soo haysa horaanta bisha Janaayo ee sanadka soo socda.
HBN NEWS DESK