Dowlad deegaanka Soomaalida ayaa la daalaa dhacaysa xaalad aad u liidata, kadib markii deegaano badan oo ka tirsan gobolka ay ka da’een roobab mahiigaan ah, kuwaasi oo geystay fatahaado iyo dhibaatooyin baahsan. Wasiir ku xigeenka xafiiska ka hortaga masiibooyinka Bashiir Xuseen Cilmi ayaa si murugo leh u faah faahiyay sida ay wax u dhaceen.
Roobab mahiigaan ah oo is daba joog ah ayaa sababay in ay buux dhaafaan wabiyada waaweyn ee dhulka Soomaalida, waxaana ka dhashay cawaaqib xumo. Wasiir ku xigeenka ayaa xaqiijiyay in degmooyin badan oo ka tirsan gobolka gaar ahaan Doolo Caddo, Kalafa, Iimey Galbeed ay yihiin meelaha ugu badan ee fatahaada wabiga uu sameeyay.
Khasaaraha ka dhashay fatahaadaha ayaa waxaa ka mid ah khasaare nafeed oo aad u badan, iyadoo ku dhawaad 15 qof ay ku naf waayeen shilal kala duwan oo la xiriira fatahaadda. Intaa waxaa dheer, daadadka ayaa barakiciyay in ka badan 11,000 qoys waxayna baabi’iyeen xoolo, waxaana ku dhintay ku dhawaad 3,320 neef. Intaa waxaa dheer, qiyaastii 8,400 hektar oo dhul-beereed ah ayay si xun u saameeyeen biyaha kor u kacaya.
Waxaa socda gurmad loo fidinayo dadka ay saameeyeen fatahaaduhu. Qalab gargaar oo ay ku jiraan cunto iyo sahayda muhiimka ah ayaa lagu diyaariyey magaalooyinka u dhow oo loo daabulay meelaha ay dhibaatadu ka dhacday. Si kastaba ha ahaatee, gaaritaanka qaar ka mid ah goobaha ay dhibaatadu ka dhacday ayaa ah mid aad u adag, maadaama waddooyinka ay xireen biyaha.
Dowladda deegaanka Soomaalida ayaa si firfircoon ula tacaaleysa dhibaatooyinkan, iyadoo aruurineysa agabka lagu caawinayo dadka ay saameeyeen fatahaaduhu.
HBN NEWS DESK