In ka badan 60 qof oo tahriibayaal ah ayaa la rumeysan yahay inay ku qaraqmeen doon ku degtay xeebaha dalka Liibiya, sida ay sheegtay hay’adda socdaalka adduunka ee IOM.
Iyadoo soo xiganeysa dad badbaaday, hay’adda Qaramada Midoobay ayaa sheegtay Sabtidii in markabka uu ka baxay magaalada Zuwara oo ay saarnaayeen ku dhawaad 86 qof.
Waxa ay sheegtay in mowjado aad u sarreeya ay ku dhufteen doonta, waxaana la la’yahay 61 qof oo tahriibayaal ah oo ay ku jiraan carruur, waxaana loo malaynayaa inay dhinteen.
Liibiya ayaa ka mid ah meelaha ugu badan ee ay ka baxaan muhaajiriinta isku dayaya inay ka gudbaan badda Mediterranean-ka oo ay galaan Yurub. Hay’adda IOM ayaa ku qiyaastay in in ka badan 2,200 oo qof ay ku qaraqmeen iyagoo isku dayaya in ay ka gudbaan sanadkan oo kaliya, taasoo ka dhigaysa mid ka mid ah waddooyinka ugu khatarta badan ee socdaalka adduunka.
Hay’addu waxay sheegtay in dadka ugu badan ee ku waxyeeloobay dhacdadii u dambaysay ay ka soo jeedaan Nigeria, Gambia, iyo wadamo kale oo Afrikaan ah, waxa ay sidoo kale sheegtay in 25 qof oo ka badbaaday loo gudbiyay xabsi ku yaalla Liibiya, lana siinayo taageero caafimaad.
HBN NEWS DESK