In ka badan 20 qof ayaa ku dhintay gelinkii dambe ee Axaddii kadib markii madaafiic lagu garaacay suuq ku yaalla xaafad ka tirsan caasimadda Suudaan ee Khartoum, sida ay bayaan ku sheegeen guddiga qareennada u ololeeya dimuqraadiyadda.
Waxa uu ahaa dhiigii ugu dambeeyay ee ku daata dagaalka tan iyo bishii April ee u dhaxeeyay ciidamada taliyaha ciidamada Abdel Fattah al-Burhaan iyo ku xigeenkiisii hore Mohamed Hamdan Daglo, oo ka amar qaata ciidamada taageerada degdega ah (RSF).
War qoraal ah oo kasoo baxay guddiga qareenada u doodaya dimuqraadiyadda ayaa lagu sheegay in madaafiicda ay ku dhaceen suuqa magaalada Omdurmaan oo ay labada dhinac isweydaarsadeen rasaas xooggan.
“In ka badan 20 qof oo rayid ah ayaa la dilay kuwa kalena waa lagu dhaawacay,” ayaa lagu yiri bayaanka oo loo diray AFP. Guddigu wuxuu la socdaa ku xad-gudubka xuquuqda inta lagu jiro iskahorimaadka iyo dhibanayaasha rayidka ah, ayaa lagu daray.
Magaalada Omdurman ayaa marar badan waxaa ka dhacay dagaalo qaraar oo u dhaxeeya labada dhinac.
In ka badan 10,000 oo qof ayaa lagu dilay iskahorimaadka Suudaan ilaa hadda, sida lagu sheegay qiyaas muxaafid ah oo ay samaysay goobta colaadaha hubaysan & Mashruuca Xogta Dhacdooyinka.
Dagaalka ayaa sababay in dad lagu qiyaasay 5.5 milyan ay ka qaxaan gudaha Suudaan iyo waliba xuduudaha, sida ay sheegtay Qaramada Midoobay.
HBN NEWS DESK