Golaha Ammaanka ee Qaramada Midoobay ayaa ansixiyay hawlgal ay Kenya hormuudka ka tahay oo looga gol leeyahay in xasillooni lagu soo dabaalo Haiti, sanad ka dib markii ay rabshaduhu ragaadiyeen hoggaamiyeyaasha dalalka Caribbean-ka ay markii hore codsadeen in la caawiyo.
Dadka saboolka ah ee reer waddanka ayaa ku jira qalalaase, kadib markii kooxo hubaysan ay qabsadeen qaybo ka mid ah dalka oo ay ka geysteen rabshado arxan darro ah, dhaqaalihii iyo nidaamyadii caafimaadka bulshada ayaa sidoo kale burburay.
Ra’iisul wasaaraha Haiti Ariel Henry iyo xoghayaha guud ee Qaramada Midoobay Antonio Guterres ayaa tan iyo dabayaaqadii 2022 ku baaqayay taageero caalami ah oo la siiyo booliiska, balse inta badan beesha caalamka ayaa ka carootay fashilka faragelintii hore ee Haiti.
Qaraarka Isniintii ayaa lagu ansixiyay 13 cod, iyadoo Shiinaha iyo Ruushka ay ka aamuseen. Waxa uu ku ammaanay wasiirka arrimaha dibadda ee Haiti Jean Victor Geneus isaga oo u keenay raad rajo ah dadka la ildaran cawaaqibka siyaasadeed, dhaqaale xumo, amni iyo xaalad bani’aadanimo oo adag.”
Horumarka laga gaaray qorshayaasha milateri ayaa yimid bishii Luulyo, markii Kenya ay si mutadawacnimo ah isugu xilqaantay inay hoggaanka qabato oo ay soo dirtay 1,000 askari.
Hawlgalka ayaa markii hore la ansixiyay muddo hal sano ah, iyadoo dib u eegis lagu sameeyay sagaal bilood ka dib.
Hawlgalka ayaa sidoo kale looga gol leeyahay in lagu abuuro shuruudo lagu qabanayo doorashooyinka, kuwaas oo aan ka dhicin Haiti tan iyo 2016.
Guterres ayaa warbixin uu dhawaan soo saaray ku sheegay in xaaladda ammaan ee dalka Haiti ay ka sii darayso, maadaama kooxaha burcadda ah ay aad u badan yihiin, kana hub badan yihiin booliiska.
Ku dhawaad 2,800 oo dil ayaa laga diiwaan galiyay Haiti intii u dhaxaysay Oktoobar 2022 iyo June 2023, iyadoo 80 carruur ah la dilay, ayaa lagu yiri warbixinta Qaramada Midoobay.
HBN NEWS DESK