Kooxo burcad badeed ah ayaa gacanta ku dhigay dooni kaluumaysi oo laga leeyahay dalka Yemen xili ay marayeen xeebaha degmada Eyl ee gobolka Nugaal. Doontaan oo sida la sheegay ka diiwaan gashan Puntland, isla markaana ruqsad u haysta kalluumaysiga, ayaa waxaa la socday 16 shaqaale ah oo u dhashay dalka Iran iyo hal shaqaale oo Soomaali ah oo loo xilsaaray ilaalinta kooxdan.
Sida uu sheegay Bashiir Siciid Cismaan oo ah wakiilka Doonta, waxaa la sameeyay isgaarsiin lala sameeyay kooxaha afduubka geystay, kuwaasoo dalbanaya lacag madaxfurasho ah oo dhan afar boqol oo kun oo dollar si loo sii daayo Doonta iyo shaqaalaha saaran. Cismaan oo hadalkiisa sii wata ayaa shaaca ka qaaday in hadii aan la bixin lacagaha madaxfurashada ay burcad badeedu ku hanjabeen in ay doonida kalluumeysiga u adeegsan doonaan in ay gacanta ku dhigaan mid kale oo ku sugan gobolkaasi.
Degmada Eyl oo taariikh ahaan caan ku ah falalka burcad badeednimada tan iyo sanadkii 2012-kii ayaa waxaa ku soo laalaabtay falalka noocaan ah. Afduubkii dhawaantan waxa uu kor u qaaday walaaca ma aha oo kaliya badqabka shaqaalaha la afduubay balse sidoo kale waxa uu keenayaa khataro ku iman kara amaanka badda ee gobolka.
Taliyaha Ciidanka Booliska Puntland, Sareeye Gaas Muumin Cabdi Shire, ayaa xaqiijiyay in laamaha ammaanku ay si firfircoon uga shaqeynayaan soo deynta doonida la afduubtay. Waxa uu sheegay in kooxaha afduubka geystay ay u dhaqaaqeen dhanka bariga fog ee badda, islamarkaana ay socdaan dadaalo lagu soo qabanayo.