Ciidamada dowladda federaalka Soomaaliya ayaa howlgalo istiraatiiji ah oo ka dhan ah kooxda Al-Shabaab ka bilaabay gobolka Baay. Ilo-wareedyo kala duwan ayaa xaqiijinaya in hawl-galladan oo ay hoggaaminayaan guutada 47-aad, qaybta 8-aad, qaybta 60-aad ee Ciidanka xoogga Soomaaliya, ay iska kaashanayaan dadka deegaanka ee abaabulan ee loo yaqaanno Macawsleyda.
Ololahan ciidan ayaa ka socda deegaano u dhaxeeya Mooda-Moode iyo Daynuunay, oo ka tirsan Gobolka Baay, ee hoos taga Maamulka Koonfur Galbeed. Taliyeyaasha hoggaaminaya howlgalka ayaa ku soo waramaya in ciidamada dowladda Federaalka ay ku guuleysteen in ay fariisimo cusub ka sameystaan deegaanno ay horay u joogeen Al-Shabaab, si hufanna ay ula wareegeen deegaannadaas.
Taliyaha qeybta 47-aad ee guutada 8-aad ee qeybta 60-aad ee ciidanka xoogga dalka Axmed Maxamed Nuur ayaa sheegay in howlgallada ka dhanka ah Al-Shabaab ay sii socon doonaan ilaa lagala wareegayo guud ahaan deegaanada ay haatan gacanta ku hayaan.
Shalay ayay aheyd markii ciidamada ammaanka ay ka warbixiyeen horumar la taaban karo oo laga gaaray dadaallada ka dhanka ah Al-Shabaab, iyadoo lagu dhawaaqay in lagu guuleystay in la cirib tiro shaqsiyaad muhiim u ahaa Al-Shabaab oo u qaabilsanaa aruurinta dhaqaalaha gobolada Baay, Bakool, Gedo ee Koonfur Galbeed iyo dowlad goboleedyada Jubbaland. Howlgalka ayaa waxaa lagu fuliyay sirdoono ay heleen ciidamada ammaanka
HBN NEWS DESK