Dadaal lagu doonayo in looga jawaabo falalka burcad badeedda ee mar kale ka soo cusboonaaday xeebahooda Puntland, ciidamada badda Puntland ayaa kordhiyey howlgallada, iyagoo sameeyay howlgallo ka dhan ah khataraha badda. Taliye C/llaahi Maxamed Axmed oo la hadlay wakaaladda wararka ee AP ayaa hoosta ka xariiqay in dowlad goboleedka ay ka go’an tahay sugidda ammaanka, inkastoo ay ku shaqeeyaan gargaar la’aanta hay’adaha caalamiga ah.
“Dawladda Puntland ayaa kali ku ah dadaalladan lagu sugayo amniga. Ma jiraan wax gargaar ah oo ka yimid Hawlgalka Midowga Afrika ee Soomaaliya, Midowga Yurub, ama kaalmo caalami ah. Laakiin waan ku dadaaleynaa” ayuu yiri Taliye Cabdullaahi Maxamed Axmed.
Dadaalladan ayaa ku soo aadaya, iyadoo dhawaan ay burcadbadeeda afduubteen dooni kalluumeysi oo laga leeyahay dalka Iran, iyagoo dalbaday madaxfurasho lacageed oo dhan 400,000 oo doollarka Mareykanka ah. Xaaladdu waxay muujinaysaa caqabadaha joogtada ah ee ay kala kulmaan maamullada gobollada si wax looga qabto khataraha burcad-badeedda si madax-bannaan.
Sidoo kale, beesha caalamka ayaa weli ka feejigan, iyadoo burcadbadeedda Soomaalida ay isku dayeen inay weerar ku qaadaan markab ganacsi oo ka babanaya calanka Liberia oo marayay gacanka Yemen. Faragelintii ugu dambeysay ee ciidamada Mareykanka iyo Ingiriiska, gaar ahaan USS Mason destroyer, ayaa fashiliyay weerarka burcad-badeedda.
Sida lagu sheegay bayaan ka soo baxay taliska dhexe ee Maraykanka, burcad-badeedda ayaa isku dayay in ay baxsadaan iyaga oo isticmaalaya doomaha dheereeya balse ugu dambayntii way is-dhiibeen ka dib markii uu baacsaday markabka USS Mason. Faragelinta waxay muujinaysaa dadaalka iskaashiga ah ee ciidamada caalamiga ah ee lagu xakameynayo dhaqdhaqaaqyada burcad-badeedda ee gobolka.
Maadaama amniga baddu uu weli yahay welwel caalami ah, beesha caalamku waxay si dhow ula socotaa ugana mahadcelinaysaa dadaallada gobolka iyo iskaashiga labadaba ee lagu doonayo in lagu xaqiijiyo badbaadada marinnada maraakiibta ganacsiga iyo xakameynta burcad-badeedda ee ka jirta istaraatiijiyada muhiimka ah ee biyaha badda Soomaaliya.
HBN NEWS DESK