Hogaamiyeyaasha beelaha Habargidir, Murusade iyo Xawaadle ayaa isku raacay in ay u midoobaan howlgal ballaaran oo ka dhan ah Al-Shabaab ee ka soconaya deegaannada Galmudug iyo Hirshabeelle, kaddib shir ballaaran ay ku yeesheen deegaanka Wara Dhuumaale ee gobolka Galgaduud, halkaas oo aym ku kulmeen jilba culusta beelahaas.
Madaxweynaha Maamulka la baxay Hiiraan State Cali Jeyte Cismaan, Xildhibaano, Wasiiro, Taliyeyaasha Ciidamada, iyo Siyaasiyiin kale ayaa sidoo kale ka qeyb galay kulanka looga saarayo Al shabaab deegaannada maamulada Hirshabeele iyo Galmudug.
Inta uu kulanka socday ayuu Cali Jeyte Cismaan ku nuux nuuxsaday in Al-Shabaab ay dhibaatooyin kala duwan ku hayeen bulshada ku dhaqan gobolada Hiiraan iyo Galgaduud dhowrkii sano ee la soo dhaafay.
Xildhibaan Maxamed Abuukar Jacfar ayaa sheegay in go’aanka ay qaateen saddexda beelood uu yahay mid lagu soo afjarayo dagaalka lagula jiro dagaallamayaasha Al-Shabaab.
Hogaamiyeyaasha saddexda beelood ayaa shirkooda isugu yimid wax yar ka dib markii Al-Shabaab ay ku dileen ku dhawaad 50 qof weeraro xiriir ah oo ka dhacayay gobollada Hiiraan iyo Galgaduud dhowrkii toddobaad ee la soo dhaafay. 15-kii Sebtembar, Madaxweynaha Galmudug Axmed Qoorqoor ayaa ka badbaaday qarax ismiidaamin ah, balse labo xildhibaan oo ka tirsan dowladda federaalka ayaa lagu dhaawacay deegaanka Laas-Gacamey oo ah deegaan yar oo ka tirsan gobolka Mudug.
24-kii Sebtembar, ugu yaraan 35 qof ayaa ku dhintay, 40 kalena waa ay ku dhaawacmeen qarax baabuur oo ka dhacay Beledweyne. Weerarkii xigay ayaa ka dhacay Buulaburte, halkaasoo shan qof ay ku dhinteen qarax kale oo loo adeegsaday gaari.
Bishii Agoosto 2022, Madaxweyne Xasan Sheekh Maxamuud ayaa bilaabay wax uu ugu yeeray “dagaal guud” oo ka dhan ah Al-Shabaab. Wajigii hore ciidamada dowladda Soomaaliya oo garab ka helaya maleeshiyaad deegaanka ah ayaa la wareegay gacan ku heynta deegaanada ay maamulaan Al-Shabaab ee ka kala tirsan gobollada Hiiraan iyo Shabeellaha Dhexe.
Todobaadki hore ayuu madaxweyne Maxamuud sheegay in duulaanka militari ee ka dhanka ah Al-Shabaab looga gol leeyahay in dhowr bilood gudahood lagu cirib tiro jiritaanka Al shabaab.
HBN NEWS DESK