Ugu yaraan 33 qof ayaa ku dhintay dhul go’ ka dhashay roobab xooggan oo ka da’ay waqooyi-galbeed ee Colombia, sida ay sheegeen saraakiisha.
“Aad ayaan uga qoomameynayaa dhimashada 33 qof ee ku dhintay masiibadan, oo u badan caruur, sida ay sheegayaan warbixinada hordhaca ah ee dhulka,” Madaxweyne ku xigeenka Francia Marquez ayaa ku soo qortay shabakadeeda bulshada ee X.
Waddo muhiim ah ayaa go’aday taasoo isku xirta magaalooyinka Quibdo iyo Medellin ee gobolka Pacific ee Choco, sida ay sheegeen saraakiisha.
Koox gaar ah oo booliska Colombia u qaabilsan samata bixinta ayaa badbaadiyay dad badbaaday waxayna soo saareen meydad Sabtidii.
Maamulka Medellin ayaa sheegay in subaxnimadii Sabtida, 17 meyd ah la geeyay halkaas, baarayaasha dambi baarista ayaa aqoonsaday saddex ka mid ah, sida ay ku warrantay wakaaladda wararka ee AFP. Lama shaacin magacyo.
Iyadoo ay dhowr waddo xirmeen, kooxaha gurmadka deg degga ah iyo dabdamiska ayaa ku dhibtooday sidii ay u gaari lahaayeen goobta ugu daran.
Sawirro laga soo qaaday baraha bulshada ayaa muujinayay in dhul ballaaran uu ka go’ay, waxaana uu ku dul dhacay dhowr baabuur oo marayey hareeraha wadada hoose oo daadad ay buux dhaafiyeen.
HBN NEWS DESK