Maxkamadda magaalada Hargeysa ayaa ku xukuntay qoraaga Cabdiraxmaan Abees hal sano iyo lix bilood oo xadhig ah. Go’aankan ayaa imaanaya maalin un kadib markii xabsiga loo taxaabay, iyadoo ay jirtay eedeymo la xiriira in maamulka Somaliland uu ka dambeeyay xarigiisa.
Abees oo caan ku ahaa dhaleecayn uu kaga soo horjeedo xukuumadda Somaliland, gaar ahaan maamulka Madaxweyne Biixi, ayaa la xiray ka dib markii uu soo saaray buugiisii u dambeeyay ee la magac baxay “Mayal” oo si toos ah u dhaliilay siyaasadda xukuumadda iyo madaxweyne Biixi.
Hooyada dhashay Abees oo la hadashay MMTV, ayaa ku celisay sheegashada ah in “Maamulka Somaliland ay ka dambeeyaan xariga wiilkeeda” , taasoo sii hurinaysa wararka la isla dhexmarayo ee ah ujeedooyinka siyaasadeed ee xukunka lagu riday. Waxa ay carabka ku dhufatay in Abees uu muddo dheer mucaarad ku ahaa xukuumadda Madaxweyne Biixi iyo sida uu ugu heelan yahay inuu qoraalkiisa ku iftiimiyo dhaliilaha dawladnimo.
Daah-furka buugga Abees ee “Mayal” ayaa la kulmay caqabado bilow ah, iyadoo mas’uuliyiintu ay si ku-meel-gaar ah u mamnuuceen siideyntiisa. Taasi oo jirto ayaa haddana ugu dambayntii la daahfuray buuggii, inkasta oo aanay goob-joog ka ahayn masuuliyiinta Somaliland. Xubnaha mucaaradka oo kaliya ayaa ka soo qayb galay bandhigga buugaagta.
Cabdiraxmaan Aadan Ibraahin oo ku magac dheeraa Abees, waa qoraa iyo abwaan caan ah oo ku caan baxay mucaaradad qayaxan oo ka dhan ah siyaasadda dawladda Somaliland. Xarigiisa iyo xukunkii lagu riday ayaa keenay walaac ku saabsan xorriyadda hadalka iyo faafreebka xukuumadda Somaliland.
Maamulka Somaliland ayaa lagu dhaliilay in uu caburin joogto ah ku hayo dadka dhaliila iyo warbaahinta. Horaantii bishan, waxa la xidhay saxafiyiin, agabkii ay wateenna waa lala wareegay, si ay u daadihiyaan madal Space ah oo lagaga hadlay heshiiskii muranka dhaliyay ee Itoobiya iyo Somaliland.
HBM NEWS DESK