Somaliland waxay ku celisay inay ka go’an tahay inay si buuxda u dhaqangeliso heshiiskii ay la gashay dawladda Itoobiya, waxaanay ku nuuxnuuxsatay inay u hoggaansanto xeerarka caalamiga ah. Wasiirka Arrimaha Dibadda Somaliland D.R. Ciise Kayd Maxamuud oo shir-jaraa’id ku qabtay xafiiska Somaliland ee Itoobiya, waxa uu hoosta ka xarriiqay “Faa’iidada labada dhinac ee laga filayo heshiiskaas oo khuseeya dhinacyada dhaqaalaha, ganacsiga iyo nabadgelyada.
Wasiir Maxamuud waxa uu iftiimiyay saamaynta laga filayo heshiiskaasi, isaga oo sheegay inuu ku kalsoon yahay inuu Somaliland iyo Itoobiyaba u horseedi doono barwaaqo. Waxa uu carabka ku adkeeyay in heshiisku aanu ahayn oo kaliya “u hogaansanaanta sharciga caalamiga ah balse sidoo kale waa tallaabo muhiim ah oo loo qaaday dhanka sare u qaadida iskaashiga laba geesoodka ah iyo kobcinta isbedelka wanaagsan.”
Si loo xaqiijiyo dhaqan galka heshiiska, Somaliland waxay magacawday guddi khubaro ah oo u xilsaaran dhaqan gelinta heshiiska. Guddidan oo ka kooban 8 xubnood oo uu hoggaaminayo Ambassador Baashe Cawil, ayaa loo xil saaray inay soo baaraan qodobbada heshiiska iyo inay fududeeyaan dhaqan-gelinta heshiiska.
Inkasta oo Somaliland iyo Itoobiya ay muujiyeen dedaalkooda, haddana heshiiska waxa uu la kulmay cadaadis dublamaasiyadeed, gaar ahaan ururrada caalamiga ah iyo kuwa gobolka sida Midowga Afrika. Ururadan ayaa walaac ka muujiyay saamaynta uu ku yeelan karo heshiiska midnimada Soomaaliya.
Nuxurka heshiiska ayaa ah heshiis deked, kaas oo ay Somaliland ku heshiisay in 20 km oo xeebteeda ah laga kireeyo Itoobiya muddo 50 sano ah. Itoobiya ayaa damacsan inay xeebaha ka sameysato saldhig ciidan iyo deked ganacsi, isla markaana Somaliland ay Itoobiya ay ka helo doonto aqoonsi.
Soomaaliya oo arrintaas ka jawaabtay ayaa si adag uga hortimid heshiiskaas, waxayna ku adkaysatay inaysan wadahadal la yeelan karin Itoobiya, haddii aysan Addis Ababa baabi’in heshiiskii lagu muransanaa ee ay la gashay Somaliland, ayna ixtiraamto madax-bannaanida Soomaaliya iyo xeerarka caalamiga ah.
HBN NEWS DESK