Midowga Yurub (EU) ayaa ku dhawaaqay ballan-qaad lacageed oo la taaban karo oo dhan $116.9 milyan oo doollarka Mareykanka ah, taasoo loogu talagalay in lagu horumariyo dadaallada kala guurka ah ee amniga Soomaaliya. Maalgelintan ayaa waxaa ku jira $74.4 milyan oo loogu talagalay in mas’uuliyadaha amniga lagu wareejiyo ciidamada Howlgalka Midowga Afrika ee Soomaaliya (ATMIS), oo la qorsheeyay in ay ka baxaan Soomaaliya dhammaadka 2024-ka.
Sidoo kale, Midowga Yurub ayaa ku yaboohay lacag dhan 42.5 Milyan oo Doollar, taasoo lagu taageerayo ciidamada Soomaaliya si ay u qaataan mas’uuliyadda amniga dalkooda. Maalgelintan istiraatijiyadeed waxay udub dhexaad u tahay awoodsiinta Soomaaliya si ay si madax-banaan u maamusho oo ay wax uga qabato caqabadaha amni ee ka jira xuduudaheeda.
Habka bixitaanka ciidamada ATMIS ayaa soo bilowday sanadkii 2023 iyadoo la raacayo Qaraarka Golaha Ammaanka ee Qaramada Midoobay ee 2023. ATMIS ayaa horey u soo gabagabeysay wajigii koowaad iyo labaad ee dhimista ciidamada, tiradaas oo dhan 5,000 oo askari, waxayna 13 xarumood ku wareejisay ciidamada ammaanka Soomaaliya. Si kastaba ha ahaatee, 4,000 oo askari oo dheeraad ah oo ATMIS ah ayaa la filayaa in laga soo saaro Soomaaliya dhammaadka bisha June.
Taageerada dhaqaale ee Midowga Yurub waxay hoosta ka xariiqday heerka ay ku sugan tahay inay tahay ka qayb-qaatayaasha ugu badan ee howlgalka ATMIS, iyadoo bixisay ku dhawaad $2.87 bilyan tan iyo 2007.
Lacagta uu Midowga Yurub u qoondeeyay kala guurka ammaanka Soomaaliya ayaa ku soo beegantay xilli xasaasi ah, taasoo muujinaysa dadaal wadajir ah oo lagu xoojinayo awoodda Soomaaliya si ay wax uga qabato caqabadaha amniga.
HBN NEWS DESK