Cumar Cabdirashiid Cali Sharmaake, Ra’iisul Wasaarihii hore ee Soomaaliya, ayaa digniin culus u jeediyay shacabka Soomaaliyeed, isagoo ugu baaqay inay u diyaar garoobaan suurta galnimada khilaafka dhex qarxa Itoobiya iyo Soomaaliya, kaasoo sababi karo xaalaad halis ah, ee ku aaddan duulaanka Itoobiya biyaha Badda Cas.
Wareysi uu siiyay warbaahin maxaliga ah ayuu Sharma’arke ku nuux-nuux saday hamiga Itoobiya ee ah in ay sheegato qeyb ka mid ah biyaha Soomaaliya, waxa uuna carabka ku adkeeyay in loo baahan yahay in la qaado tilaabo adag oo difaac ah si looga hortago xadgudubyadaas.
Sharma’arke ayaa walaac ka muujiyay ra’iisul wasaaraha Itoobiya, Abiy Axmed, isagoo soo jeediyay in Abiy Axmed uu ka fikiro ficillo keeni kara colaad u dhexeysa labada waddan ee dariska ah.
Ra’iisul Wasaarihii hore ee Soomaaliya ayaa ku baaqay in laga digtoonaado wax ka qabashada dalabaadka Itoobiya, wuxuuna ugu baaqay madaxda Urur Goboleedka IGAD inay diidaan codsi kasta oo uga yimaada Abiy Axmed.
RW Sharma’arke ayaa dhaliilay heshiiskii ay dhawaan dowladda Itoobiya la gashay madaxweynaha Somaliland Muuse Biixi Cabdi, kaasoo ahaa in Itoobiya ay doonayso inay hesho biyaha Soomaaliya, si Somaliland loo aqoonsado dal madax-bannaan.
Heshiiskan oo horaantii bishii Janaayo ka dhacay magaalada Addis Ababa ayaa ka dhashay walaac ku saabsan khalkhal gelinta gobolka iyo xiisadaha u dhaxeeya Soomaaliya iyo Itoobiya.
Hadalka Sharmaake waxa uu hoosta ka xariiqayaa cabsida sii kordheysa ee ka jirta Soomaaliya ee la xiriirta damaca Itoobiya ee dhul balaarsi iyo saameynta ay ku yeelan karto xasiloonida gobolka. Muranka badda oo uu weheliyo khilaaf juqraafiyeed, ayaa caqabad weyn ku ah xiriirka diblomaasiyadeed ee labada dal, wuxuuna halis ku yahay inuu sii xumeeyo xiisadda Geeska Afrika.
Warkaana ayaa ku soo beegmaya iyadaa oo warsaxaafadeed kasoo baxay wasaaradda Arrimaha Dibadda Itoobiya looga codsaday Jabuuti iyo Itoobiya qabashada shir madaxeed aan caadi ahayn si ay Itoobiya u sharaxdo arimaha gobolka ee taagan.
HBN NEWS DESK