Ciidamada dowladda Soomaaliya ayaa ku guuleystay howlgal qorsheysan oo kooxda Al-Shabaab ay ku bartilmaameedsadeen gobolka Shabeellaha Hoose. Howlgallada oo ka dhacay inta u dhaxeysa degmooyinka Afgooye iyo Wanlawain ayaa ahaa mid lagu doonayay in lagu carqaladeeyo dhaq dhaqaaqyada kooxda, islamarkaana ay dib ugala wareegaan gacan ku heynta deegaanada ay maamulaan.
Sida uu sheegay Afhayeenka Wasaaradda Gaashaandhigga, Abuukar Maxamed Xasan, waxaa uu sheegay in howlgalkaasi ay Al-Shabaab kaga soo furteen ay fasaxeen ku dhawaad 20 gaari oo Xamuul ah oo ay leeyihiin dad shacab ah. Waxaa la sheegay in kooxdan ay qaadan jireen lacago baad ah iyo waxyaabo kale oo sharci darro ah.
Howlgalka ayaa sidoo kale lagu soo qabtay Maleeshiyaad badan oo ka tirsan Al-Shabaab oo ku sugnaa goobihii ay howlgallada ka sameeyeen. Inkastoo aan si rasmi ah loo shaacin khasaaraha dhabta ah ee soo kala gaaray dhinacyadii dagaalamay, hadana Wasaaradda Gaashaandhigga ayaa tilmaantay muhiimadda istiraatijiyadeed ee howlgalkan lagu wiiqayo awoodda howlgal ee kooxda.
Gobolka Shabeellaha Hoose ayaa muddo dheer saldhig u ahaa Al-shabaab, iyadoo inta badan Al-shabaab ay weeraro ku qaadaan goobaha ay ku sugan yihiin ciidamada. Howlgalladan ay fuliyeen ciidamada dowladda Soomaaliya ayaa ka dhigan tallaabo muhiim ah oo lagu sugayo ammaanka gobolka iyo sidii bulshada deegaanka looga badbaadin lahaa dhibaatooyinka ay geysanayaan kooxda, sida ay ku warrameen saraakiisha.
Dowladda Soomaaliya oo taageero ka hesha saaxiibada caalamka ayaa sii wada dadaallada lagu ciribtirayo Al-shabaab, laguna soo celinayo nabadda iyo xasilloonida deegaannada ay dhibaatadu ka dhacday. Hawlgalkan ayaa qayb ka ah istaraatiijiyad ballaadhan oo lagu carqaladaynayo maalgelinta kooxda iyo isku xirka qorista, iyo xoojinta kaabayaasha amniga ee gobolka.
Wasaaradda Gaashaandhigga ayaa muujisay sida ay uga go’an tahay sii wadista howlgallada noocaan ah, si loo sugo amniga iyo nabadgalyadda shacabka Soomaaliyeed, loogana hortago falalka Al-Shabaab.
HBN NEWS DESK