Golaha Ammaanka ee Qaramada Midoobay (QM) ayaa la filayaa in maanta oo Talaado ah u codeeyo qaraar lagu kordhinayo muddada Howlgalka Midowga Afrika ee Taageerada iyo Xasilinta Soomaaliya (AUSSOM) sanad kale, ilaa 31 December 2026. Qaraarkan ayaa waxaa diyaarisay Boqortooyada Ingiriiska oo ah dalka qabanqaabiya arrimaha Soomaaliya ee Golaha Ammaanka, kaddib wadaxaajoodyo dheer iyo dib u dhacyo soo maray qabyada qoraalka.
Qaraarka cusub ayaa tilmaamaya in lagu sii hayo tirada ciidamada AUSSOM ee hadda jooga Soomaaliya, kuwaas oo gaaya 11,826 askari, oo ay ku jiraan 680 boolis ah. Waxa kale oo uu adkeynayaa baahida degdegga ah ee taageero dheeri ah iyo maalgelin caalami ah si loo xoojiyo awoodda ciidamada ammaanka Soomaaliya ee la dagaallanka kooxda Alshabaab, maadaama weerarrada kooxda ay sii kordheen bilihii u dambeeyay.
Qaraarka ayaa sidoo kale codsanaya in QM, Midowga Afrika iyo Dowladda Federaalka Soomaaliya ay sii wadaan qiimeyn wadajir ah oo joogto ah si loo cabbiro horumarka ku wajahan wareejinta mas’uuliyadda amniga ee dalka.
Wadaxaajoodyada qaraarka ayaa adkaa, iyadoo khilaaf ka dhashay in lagu daro qodobbo la xiriira mustaqbalka Howlgalka Kaalmada Kumeelgaarka ah QM ee Soomaaliya (UNTMIS). Dalalka A3 Plus (Aljeeriya, Sierra Leone, Soomaaliya iyo Guyana) ayaa ka hor yimid, iyagoo ku dooday in UNTMIS looga baahan yahay qaraar u gaar ah. Si kastaba, qoraalka kama dambaysta ah ee warbixinta wuxuu qeexayaa in howlgallada UNTMIS ay dhammaan doonaan 31 October 2026.
Haddii qaraarku dhaqan galo, wuxuu qaabeyn doonaa marxaladda xigta ee isbeddelka amniga Soomaaliya labada sano ee soo socda.
HBN Online TV