Madaxweynihii hore ee Soomaaliya, Maxamed Cabdullaahi Farmaajo, ayaa soo saaray bayaan siyaasadeed oo faahfaahsan, isaga oo muujiyay walaac ku saabsan xaaladda amniga, siyaasadda, dhaqaalaha iyo bulshada ee dalka, isla markaana ku baaqay wadahadal qaran iyo midnimo.
Bayaanka oo ka soo baxay xafiiskiisa, Farmaajo wuxuu sheegay in Soomaaliya ay wajahayo “caqabado amni oo halista ah,” isaga oo ku eedeeyay maamulka hadda jira “in uu ku guuldarreystay ciribtirka buuxa ee khataraha argagixisada,” isla markaana ka digay in kala-daadsanaanta ciidanka qaranku ay wiiqday difaaca dalka.
Sidoo kale, wuxuu muujiyay walaac ku saabsan waxa uu ku tilmaamay “soo noqoshada xiisadaha hubeysan ee ku saleysan qabiil” ee ka jira qaybo ka mid ah dalka.
Dhanka siyaasadda, madaxweynihii hore wuxuu sheegay in geeddi-socodka maamul ee Soomaaliya uu ka leexday “jidkii dastuuriga ahaa ee lagu heshiiyay,” isaga oo ku dooday in go’aannada siyaasadeed ee waaweyn ay u baahan yihiin is-afgarad qaran oo ballaaran.
Wuxuu ka digay in tallaabooyin siyaasadeed oo hal dhinac ah ay “sii fogeyn karaan kala-qaybsanaanta, isla markaana khatar gelin karaan dadaallada dhismaha dowladnimada.”
Dhaqaalaha, Farmaajo wuxuu xusay “sicir-barar sii kordhaya, dhibaatooyin la xiriira wareegga lacagta, iyo kalsooni darro dadweyne,” isaga oo ku boorriyay mas’uuliyiinta inay ilaaliyaan bulshooyinka nugul ee ay saameeyeen abaaraha iyo duruufo adag. Isaga oo ku baaqaya xal nabadeed, Farmaajo wuxuu dalbaday “dadaal badbaadin qaran,” wuxuuna ku booriyey dowladda federaalka, dowlad-goboleedyada, odayaasha dhaqanka, bulshada rayidka ah iyo muwaadiniinta inay midoobaan si loo “ilaaliyo xasilloonida qaranka, amniga iyo ku-dhaqanka dastuurka.”
Wuxuu sidoo kale ku baaqay in dib loo xoojiyo la-dagaallanka argagixisada, dib-u-heshiisiinta siyaasadeed iyo wadahadal loo dhan yahay.
Ugu dambayn, Farmaajo wuxuu u mahadceliyay saaxiibada caalamiga ah taageeradooda joogtada ah, wuxuuna ku dhiirrigeliyay shacabka Soomaaliyeed inay rajo yeeshaan, isagoo sheegay in wadahadalka iyo is-afgaradku ay weli yihiin furaha mustaqbalka Soomaaliya.
HBN Online TV