Mas’uuliyiinta amniga Soomaaliya ayaa sheegay in in ka badan 10-kun oo askari la geyn doono caasimadda Muqdisho ka hor doorashada goleyaasha deegaanka ee dhici doonta 25-ka bishaan Diseembar, xilli dalka uu isu diyaarinayo doorashada tooska ahayd ee ugu horreysay ku dhowaad lixdan sano.
Mas’uuliyiintu waxay sheegeen in ciidamadan si gaar ah loogu xoojin doono ammaanka goobaha codbixinta, shaqaalaha doorashada iyo codbixiyeyaasha, isla markaana looga hortagi doono falal amni-darro iyo isku day kasta oo carqaladeyn ah oo dhici kara.
Dowladda Soomaaliya ayaa sheegtay in codbixinta 25-ka Diseembar ay tahay tallaabo muhiim ah oo lagu xaqiijinayo kala guurka dimuqraadiyadda dalka. Bishii Abriil ee la soo dhaafay, Soomaaliya ayaa billowday diiwaangelinta codbixiyeyaasha markii ugu horreysay tobannaan sano, taas oo ay taageerayaasha dowladda ku tilmaameen horumar taariikhi ah oo lagu gaari karo nidaamka qof iyo-cod ah, lagana guurayo nidaamkii ku dhisnaa beelaha ee jiray tan iyo 1969-kii.
Sidoo kale, Mas’uuliyiinta ayaa sheegay in diyaar-garowga doorashada uu si habsami leh u socdo, iyagoo shacabka ugu baaqay inay si ballaaran uga qeyb qaataan codbixinta, islamarkaana ku sifeeyay doorashadan imtixaan muhiim u ah awoodda ciidamada amniga iyo geeddi-socodka dib-u-habaynta siyaasadeed.
Dhanka kale, qaar ka mid ah siyaasiyiinta mucaaradka iyo xisbiyada ka baxay ololaha doorashada ayaa dhaliilay hufnaanta habraacyada doorashada, iyagoo ku eedeeyay guddiga doorashada sida hadalka ay u dhigeen inuu yahay mid aan dhexdhexaad ahayn, kana maqan caddaalad iyo isla-xisaabtan.
HBN Online TV