Wasiirka Arrimaha Dibedda Soomaaliya Cabdisalam Cabdi Cali, ayaa maanta Muqdisho kaga guddoomay nuqul ka mid ah waraaqaha aqoonsiga danjarannimo ee safiirrada cusub ee dalalka Canada, Finland, Norway, Cuba iyo Spain.
Safiirrada cusub ayuu Wasiirku ugu hambalyeeyey sidii sharafka iyo masuuliyadda leh ee ay ugu soo biireen safka diblomaasiyiinta ka howlgala gudaha Soomaaliya. Waxa uu xusay muhiimadda ay leedahay in la xoojiyo xiriirka laba-geesoodka ah iyo iskaashiga caalamiga ah ee Soomaaliya kala dhexeeya dalalka ay matalayaan.
Sidoo kale wuxuu ku dhiirrigeliyey safiirrada inay xoogga saaraan horumarinta xiriirka saaxiibtinimo, iskaashiga dhaqaale, amni, caafimaad, waxbarasho iyo dhinacyada kale ee ay labada dal ka wada shaqayn karaan, isaga oo carrabka ku adkeeyey in shacabka iyo dowladda Soomaaliyeed ay si kalgacal leh u soo dhaweynayaan, ayna diyaar u yihiin inay si dhow ula shaqeeyaan.
Kulankan diblomaasiyadeed ayaa astaan u ah dadaallada socda ee dowladda Soomaaliya ee ku aaddan kobcinta xiriirka caalamiga ah iyo ballaarinta fursadaha iskaashi ee ay la leedahay dalalka saaxiibada ah.
Hbn Online Tv