Dowladda Federaalka Soomaaliya ayaa tacsi tiiraanyo leh u dirtay dowladda iyo shacabka Kenya, kaddib geeridii naxdinta lahayd ee ku dhawaad 50 qof oo ku dhintay burburka biyo xireenka iyo fatahaadda xooggan ee ka dhacday agagaarka caasimadda Nairobi.
War saxaafadeed ay soo saareen dowladda Soomaaliya ayay ku sheegeen in ay aad uga xun yihiin musiibada dabiiciga ah ee ku habsatay dalka ay deriska yihiin. War-saxaafadeedka ayaa u dhignaa sidan: “Waxaan aad uga xunnahay khasaaraha nafeed ee ka dhashay burburka biyo xireenka iyo fatahaadda Kenya.
Dowladda Soomaaliya ayaa Kenya u ballan qaaday in ay garab istaagi doonto xilligan adag, iyadoo ku nuux-nuuxsatay muhiimadda ay leedahay in la iska kaashado gobolka xilliyada qalalaasaha. War saxaafadeedk ayaa lagu yiri “Waxaan garab istaagnay Kenya xilligan adag, waxaanan siinaa taageero buuxda iyo iskaashi ku aaddan dadaallada soo kabashada iyo dib u dhiska.”
Sidoo kale, dowladdu waxay ku baaqday in loo midoobo oo la caawiyo bulshada dhibaateysan, iyadoo ku boorisay inay xoojiyaan dhibaatooyinka jira. “Waxaan ugu baryaynaa bulshada ay dhibaatadu soo gaartay in ay ka dulqaadaan dhibaatada iyo burburka intaas le’eg, waxaan shaki ku jirin in shacabka Kenya ay dhibaatadaas uga bixi doonaan si ka adag sidii hore,” ayaa lagu soo gabagabeeyay war-saxaafadeedka.
Iyadoo dowladda Kenya iyo shacabkeedu ay bilaabeen dib u soo kabashada iyo dib u dhiska dalka, ayaa dowladda federaalka Soomaaliya waxa ay u fidisay kaalmo iyo taageero dhinac walba ah.
Tallaabadan wadajirka ah ayaa ah mid lagu xusuusinayo xiriirka xooggan ee ka dhexeeya labada dal ee Bariga Afrika iyo sida ay uga go’an tahay inay is taageeraan marka loo baahdo.
HBN NEWS DESK