Mareykanka ayaa dhawaanahanba muujiyay taageerada uu siinayo Soomaaliya dadaalka ay ugu jirto wax loogu yeero “la dagaalanka argagixisada”,iyaga oo tababaray dufcad cusub oo ka tirsan Kumaandooska Danab.
Hindisahani waxa uu hoosta ka xariiqayaa iskaashiga xooggan ee ka dhexeeya Maraykanka iyo Soomaaliya dadaalka wadajirka ah ee la dagaalanka argagixisada iyo kor u qaadista amniga gobolka.
Guutada Danab oo ah ciidamo si gaar ah u tababaran oo ka tirsan Kumaandooska Soomaaliya ayaa qeyb muhiim ah ka ahaa dagaalka lagula jiro kooxda Al-Shabaab oo si weyn looga yaqaano Soomaaliya. Mareykanka ayaa kaalin mug leh ka qaatay horumarinta iyo tababarka ciidamada Danab, iyadoo la og yahay inay muhiim tahay in laga hortago khatarta argagixisada ee gobolka.
Tababarka Dufcada cusub ee Kumaandooska Danab ayaa ka dhacay Dugsiga Tababarka Korneel Xasan Tuure oo loo yaqaano Ex Balidoogle, ee Gobolka Shabeellaha Hoose. Barnaamijkan tababarka oo dhameystiran, ayaa ciidamada Kumaandooska ee Danab waxaa lagu qalabeeyay xirfado iyo xeelado horumarsan oo ay si hufan ula dagaallamaan Al-Shabaab iyo khataraha kale ee argagixisada Soomaaliya.
Dhammaystirka barnaamijkan tababarka oo si guul ah u soo dhammaaday ayaa lagu sheegay mid caddayn u ah sida ay dawladda Maraykanku uga go’an tahay inay Soomaaliya ka taageerto dedaallada ciribtirka argagixisada iyo horumarinta nabadda iyo xasilloonida gobolka.
Wadashaqeynta joogtada ah ee ka dhaxeysa Mareykanka iyo Soomaaliya ayaa muhiim u ah guul laga gaaro howlgalkan, maadaama uu isku xirayo khibradaha iyo agabka Mareykanka iyo aqoonta gudaha iyo ka go’naanta ciidamada Soomaaliya. Labada dal ee iskaashanaya ayaa horumarro la taaban karo ka sameynaya la dagaallanka argagixisada iyo xaqiijinta mustaqbal ammaan ah oo Soomaaliya iyo gobolka oo dhan ah.
HBN NEWS DESK