Xoghayaha Difaaca Mareykanka Lloyd Austin ayaa sheegay in loo baahan yahay in la joogteeyo dagaalka lagula jiro kooxda Al-Shabaab ee Jihaad doonka ah ee ka dagaalanta Soomaaliya in kasta oo ay dib u dhacyo kala kulmayaan ciidamada xoogga dalka oo mararka qaar gacan siiya ciidamada Washington.
Austin ayaa hadalkan sheegay ka dib markii dowladda Soomaaliya ay codsatay in dib loo dhigo ka bixitaanka howlgalka Midowga Afrika ee Soomaaliya (ATMIS) todobaadkii hore, kaasoo horay u billowday in si tartiib-tartiib ah saldhigyada loogu wareejiyo ciidamada Qaranka horaantii sanadka 2023-ka.
Haddaba, warqad ay u dirtay Qaramada Midoobay, ayaa Hay’adda Fulinta waxay ku codsatay hakin farsamo oo sagaashan maalmood ah dib loo dhigo ciidamada ATMIS.
Xoghayaha ayaa kulan la qaatay Madaxweynaha Soomaaliya Xasan Sheekh Maxamuud, isagoo ku macneeyay inuu u baahan yahay waqti dheeri ah, maadaama uu wajahayo howl adag oo ah inuu sii joogteeyo cadaadiska Al Shabaab, isla markaana uu soo uruuriyo ciidamo si ay awood ugu yeeshaan inay sii ahaadaan kuwo tayo leh.
ATMIS waxaa Soomaaliya ka joogay ilaa 20,000 oo askar ah, kuwaas oo u badan Uganda, Burundi, Kenya, Djibouti iyo Ethiopia.
30-kii Juun, howlgalka ayaa dhameystiray wajigiisii ugu horreeyay ee bixitaanka ka dib markii Golaha Ammaanka ee Qaramada Midoobay uu ansixiyay bixitaanka 2,000 oo ka mid ah ciidamadooda ka hor taariikhdaas.
18-kii Sebtembar, waxa bilaabmay wajigii labaad, kaas oo la doonayey in la dhamaystiro oo ay ka baxaan 3,000 oo kale ka hor dhamaadka bishaan.
Hannaankan ayaa kusoo beegmaya iyadoo la xoojinayo howlgallada ka dhanka ah Al-shabaab kaddib markii madaxweynaha Soomaaliya uu August 2022 ku dhawaaqay dagaal guud oo ka dhan ah ururka jihaad doonka ah.
Wixii intaas ka dambeeyay ciidamada qalabka sida ee Soomaaliya oo taageero ka helaya ATMIS ayaa qaaday weeraro xooggan oo ka dhan ah Al shabaab, iyadoo mararka qaar ay iskaashanayaan ciidamada cirka ee Washington.
Al Shabab, oo xiriir la leh tan iyo 2012-kii Al-Qaacida, ayaa inta badan weeraro ka geysta caasimadda Muqdisho, iyo gobollada kale ee dalka si ay u afgambiyaan dowladda dhexe oo ay taageerto beesha caalamk isla markaana ay ku dhistaan nidaam Islaami ah.
Kooxda ayaa ka talisa dhulka miyiga ah ee bartamaha iyo koonfurta Soomaaliya. Si kastaba ha ahaatee, ciidamadu waxay dib u soo ceshadeen qaar ka mid ah dhulalkaas sannadkii hore. Waxay weerartay dalalka dariska ah sida Kenya iyo Itoobiya.
Soomaaliya waxay ku jirtay dagaallo iyo fowdo tan iyo sannadkii 1991-kii, markii xukunka laga tuuray Maxamed Siyaad Barre, , isla markaana ay gacanta u gashay kooxo Islaamiyiin ah iyo qabqablayaal dagaal.
HBN NEWS DESK