Dowladaha Soomaaliya iyo Kenya ayaa gaaray hishiis heersare ah loo qaaday wax ka bedelka hannaanka waxbarasho ee dhalinyarada Soomaaliyeed isla markaana Wasaaradaha waxbarashada labada dal ay gaareen hishiis dhigaya in Jaamacadaha Kenya ay ku biiri karaan ardayda Soomaaliyeed.
Jaamacadaha Kenya waxa ay albaabada u fureen ardayda ka imaaneysa Soomaaliya oo heysta shahaado dugsi sare oo ay aqoonsan tahay Wasaaradda Waxbarashada Xukuumadda Federaalka Soomaaliya.
Qorshahan oo ah mid aan horay loo arag ayaa u sahlaya ardayda Soomaaliyeed in ay helaan waxbarasho sare oo tayo leh, taasi oo fursad u siinaysa in ay kor u qaadaan xirfadahooda, kana qayb qaataan horumarka dalkooda.
Kenya iyo Soomaaliya waxa ay sidoo kale sahmin karaan dadaallada cilmi-baarista ee wadajirka ah oo si toos ah wax uga qabta baahiyaha horumarineed ee labada dal.
Kenya, oo leh kaabayaal tacliineed oo xooggan, waxay sheegtay inay u taagan tahay inay taageerto dib-u-soo-nooleynta waxbarashada Soomaaliya iyadoo horumarinaysa xiriir qotodheer oo siyaasadeed iyo mid dhaqan-dhaqaale
Soddonkii sano ee la soo dhaafay, Soomaaliya waxaa ragaadiyay dagaallo sokeeye iyo colaado gudaha ah, kuwaas oo sababay in ay lumiyaan hannaankii waxbarashada ee soo jireenka ahaa iyo xirfadlayaasha aqoonta leh. Xilligan qalalaasaha ah ayaa si weyn u hakiyay horumarkii waxbarashada.
Si kastaba ha ahaatee, iyadoo Soomaaliya ay weli ka soo baxayso caqabadahaas, ayaa haddana fursaddan ka jirta jaamacadaha Kenya waxay ka dhigan tahay isbeddel muhiim ah oo ay dhallinyarada Soomaaliyeed u baahan yihiin.
Muhiimadda ay Soomaaliya u leedahay waxbarashada sare lama soo koobi karo, gaar ahaan marka loo eego baahida degdegga ah ee loo qabo in dib loo soo nooleeyo waaxdeeda horumarinta iyo tignoolajiyada.
Helitaanka jaamacadaha Kenya waxay ardayda Soomaaliyeed siineysaa khibrad farsamo iyo tababaro gaar ah oo loo baahan yahay si wax looga qabto baahiyaha qaran ee jira.
HBN NEWS DESK