Guddoonka golaha Shacabka ee Soomaaliya ayaa maanta ku dhawaaqay in laga bilaabo hadda aan dib loogu cudur-daari doonin xildhibaannada ka maqanaada kulamada iyaga oo aan fasax haysan, isla markaana laga jari doono lacagaha gunnada bishan.
Guddoomiye ku xigeenka labaad ee Golaha Shacabka Cabdullaahi Cumar Abshirow ayaa sheegay 149 xildhibaan oo maanta ka baaqday kulanka Golaha Shacabka in laga jari doono gunnadooda, kaddib markii digniino badan hore loogu diray ay ku fashilmeen inay soo xaadiraan. Waxa uu tilmaamay in xildhibaanno ka tirsan Xukuumadda oo ku sugnaa xafiisyadooda isla markaana xaadiri karay fadhiga, ay qayb ka yihiin mudanayaasha gunnada laga jarayo.
“Waa in laga jaro gudana xildhibaanka maanta maqan. Dulqaadkeenu wuxuu gaaray in xildhibaanada iska maqnaadaan iyagoo jooga. Xeer hoosaadka wuxuu dhigayaa in gunnada laga jaro xildhibaannada maqnaada,” ayuu yiri Abshirow.
Wuxuu ku sii daray “Muddo saddex saac ah ayaan joogney fadhiga, waxaana dhaafi weynay 126 xildhibaan. Xildhibaannadu iyaga oo magaalada jooga ayay maqan yihiin, maqnaanshahooduna waa khalad, ha ahaadeen xildhibaanno ama xubno ka tirsan Xukuumadda”.
Kulamadii u dambeeyay ee Golaha Shacabka ayaa marar badan u baaqday kooram la’aan, iyadoo guddoonka goluhu sheegay in ay qaadayaan tallaabo ka dhan ah maqnaanshaha joogtada ah ee xildhibaannada.
Hbn Online Tv