Turkiga ayaa u diyaar garoobaya inuu dhawaan bilaabo tijaabooyinka badda ee markabkii ugu horreeyay ee diyaaradaha xambaara oo gudaha lagu sameeyay, iyadoo qorshuhu yahay in la hawlgaliyo toban sano gudahood markab kale , sida uu sheegay mas’uul sare oo ka tirsan difaaca.
Sameynta markab diyaarado xambaara oo lagu sameeyay gudaha dalka ayaa wuxuu siinayaa Turkiga awood badeed oo xooggan markii ugu horreysay, isagoo ballaarinaya saameynta uu ku leeyahay Badda Mediterranean iyo Badda Madow, isla markaana xoojinaya kaararka uu ku gorgortami karo.
Madaxweynaha Turkiga Recep Tayyip Erdogan wuxuu si xooggan u taageeraa dadaalka dalka ee ku aaddan isku-filnaanshaha difaaca iyo ballaarinta dhoofinta hubka.
Kartida sii kordhaysa ee Turkiga ayaa taageeri karta howlaha badeed ee NATO, balse waxay kaloo muujinaysaa awoodda Ankara ee ku aaddan inay u dhaqdhaaqdo ajendahaheeda istiraatiijiyadeed.
Wargeyska Newsweek ee ka soo baxa Mareykanka oo warbixintan qoray ayaa daabacay in markabka cusub ee diyaaradaha xambaara ee Turkiga, kaas oo la hawlgelin doono 2028, uu ka duwan yahay kuwa caadiga ah, maadaama loo qaabeeyey inuu noqdo “markab diyaarado aan duuliye lahayn xambaara oo leh sagxad ka-duulid ama meel fidsan oo ay diyaaraduhu ka duulaan”
Shirkadda farsamada qalabka military-g hawada ee Turkiga iyo tan Baykar oo ah shirkad gaar loo leeyahay oo ah hormuudka dhoofinta diyaaradaha aan duuliyaha lahayn ayaa la filayaa inay tijaabooyinkooda bilaabaan bilaha soo socda.
Warbixintu waxay soo xigtay hadal uu bixiyay Admiral Recep Erdinç Yetkin, taliyaha warshadda maraakiibta ee Istanbul, oo u sheegay telefishinka CNN Turk in dhismaha markabka uu durba bilowday.
Tekin wuxuu shaaca ka qaaday in markabka diyaaradaha xambaara ee qaran uu dhererkiisu yahay 285 mitir isla markaana culayskiisu yahay 60,000 tan, marka loo barbardhigo markabka hadda jira ee TGG Anadolu oo dhererkiisu yahay 230 mitir isla markaana culayskiisu yahay 27,000 tan.
Waxaa xusid mudan in ciidamada badda Turkiga ay hadda adeegsadaan markabka “TGG Anadolu” oo loogu talagalay diyaaradaha aan duuliyaha lahayn, kuwaas oo ay ka mid yihiin “Kizil Alma”, “TB3”, “Anka”, iyo “TB2” diyaaradahaasi oo awoodi doona inay ka duulaan isla markaana ku soo degaan markabka oogadiisa.
Wasaaradda difaaca Turkiga ayaa mashruuca markabka diyaaradaha xambaara markii ugu horreysay shaaca ka qaaday sanadkii hore, dhismihiisuna wuxuu bilowday bishii Janaayo.
Wargeyska Newsweek ayaa xustay in Turkiga uu sidoo kale horumarinayo barnaamijyo kale oo hub casri ah, sida maraakiibta quusta ee TF, nidaamka difaaca cirka gudaha lagu farsameeyay ee Steeldome, iyo diyaaradda dagaalka ee Qaan.
Karti sii kordhaysa ee difaaca Turkiga ayaa imaanaysa xilli ay sii kordhayso xiisadda kala dhaxaysa Israa’iil, iyadoo Ankara gooysay si buuxda dhamaan xiriirkii ganacsi maalintii Jimcaha sababo la xiriira colaadda ka sii daraysa ee Qaza.
Erdogan ayaa wargeyska Newsweek u sheegay in waxa go’aamiya farqiga u dhexeeya inaad “miiska fadhido” iyo inaad “saxan miiska saaran tahay” ay yihiin awoodahaaga difaaca cirka iyo kuwa weerarka. Wuxuu yiri: “Iyadoo fahamkaas ah, waxaan horumar weyn ka sameynay geeddi-socodkii dhismaha iyo horumarinta ee aan waqti dheer ka hor bilownay. Waqti gaaban gudaheed waxaan ku tallaabsannay masaafo fog, in kasta oo caqabado badan jireen. Natiijooyinka maanta waa caddeynta ugu weyn ee muujinaysa in dadaalkeenna aanu khasaarin.”
HBN Online TV