Madaxweyne Donald Trump ayaa Talaadadii ayaa u qabtay dhiggiisa Ruushka Vladimir Putin 10 maalmood si uu u joojiyo dagaalka, isagoo ugu hanjabay cunaqabateyn cusub oo adag.
Madaxweyne Putin ayaa dalbanaya in Kyiv ay ka tanaasusho gobollada Donetsk, Lugansk, Kherson iyo Zaporizhzhia, kuwaasi oo Ruushku si qasab ah ula wareegay bishii Sebtembar 2022 iyo gobolka Crimea, oo Ruushku qabsaday 2014.
Moscow waxay sidoo kale dalbanaysaa in Ukraine ay ka tanaasusho qorshaha ay ku doonayso ku biirista NATO.
Laakiin mas’uuliyiinta Ukraine si cad ayay u diideen arrintan, waxayna dalbanayaan in ciidamada Ruushka si buuxda uga baxaan dhulkooda oo ay 20% qabsadeen.
Dhinaca kale, milateriga Ruushka ayaa xaqiijiyay in ay la wareegeen magaalada Chasiv Yar, taasoo ah xarun istaraatiiji ah oo ciidanka Ukraine ku leeyihiin gobolka Donetsk ee bariga Ukraine.
Wasaaradda Gaashaandhigga Ruushka ayaa sheegtay in ciidamada Ruushka ay “xoreeyeen” magaalada Chasiv Yar, oo muddo bilo ah ay dagaallo culus ka socdeen.
Geesta kalena, madaxweynaha Mareykanka Donald Trump ayaa si toos ah ugu digay madaxweynihii hore ee Ruushka Dmitry Medvedev inuu ka fiirsado hadalladiisa, kadib markii dagaal afka ah uu ka dhex qarxay labada dhinac. Trump ayaa fariin uu ku qoray baraha bulshada wuxuu ku sheegay in Medvedev uu galay aag khatar ah sida hadalka uu u dhigay, wuxuuna yiri “Aan u sheegno Medvedev, madaxweynihii guuldaraystay ee Ruushka, oo is leh waxaa tahay madaxweyne, waa inuu ka fiirsada hadalladiisa.”
Xiisadda ayaa ka dambeysay kadib markii Dmitry Medvedev uu si kulul u weeraray Madaxweyne Trump Isniintii, taasi oo ka dambeysay hanjabaada Trump uu ku hanjabay inuu soo gaabiyay waqtiga uu qabtay in Ruushku ku joojiyo dagaalka.
Medvedev wuxuu ku qoray baraha bulshada “waqti kasta oo cusub oo la isku qabto waa hanjabaad iyo talaabo u dhow dagaal. Ma aha dagaal u dhexeeya Ruush iyo Ukraine, balse wuxuu noqon doonaa dagaal dhexmara Ruush iyo Mareykanka.”
Wuxuu intaas ku daray: “in Ruushka uusan ahayn Israa’iil ama Iiraan,” isagoo tusaale u soo qaatay dagaalkii koobnaa ee bishii hore ka dhex dhacay Israa’iil iyo Iiraan, xilli Mareykanku weeraro ku qaaday Iiraan isagoo taageeraya Israa’iil.
HBN ONLINE TV