Wasiirka Arrimaha Dibadda ee Eritrea, Cismaan Saalax ayaa beeniyey eedeymaha sheegaya in Eritrea ay diyaar u tahay dagaal cusub oo ay la gasho Itoobiya. Wuxuu xusay in eedeymahan ay salka ku hayaan dano siyaasadeed oo lagu doonayo in mas’uuliyadda dhibaatooyinka gudaha ee Itoobiya la saaro Asmara.
Wasiirku wuxuu shir jaraa’id ku caddeeyey in eedeymaha ugu muhiimsan ee loo jeedinayo dalkiisa ay la xiriiraan xasillooni-darro goboleed, iyadoo la sheegayo in Eritrea ay isku diyaarinayso dagaal ka dhan ah Itoobiya.
Wuxuu sidoo kale xusay in eedeymaha ay taabanayaan heshiiskii Pretoria ee dhex maray dowladda Itoobiya iyo Jabhadda Tigray, iyo sidoo kale hadallada ku saabsan hamiga Itoobiya ee ku aaddan helitaanka bad.
Saalax wuxuu eedeymahaas ku tilmaamay isku day lagu doonayo in Eritrea lagu eedeeyo mushkiladaha gudaha ee Itoobiya, xilli Addis Ababa ay la tacaalayso caqabado waaweyn oo siyaasadeed.
Marka la eego dhaq-dhaqaaqa ciidamada Eritrea ee dhulka Itoobiya, Wasiirka Arrimaha Dibadda ee Eritrea wuxuu caddeeyey in ciidamadooda ay si buuxda ugu laabteen xadka caalamiga ah ee la aqoonsan yahay, ka dib markii dagaalku dhammaaday bishii Nofeembar 2022.
Wuxuu sheegay in eedeynta ah in ciidamadoodu wali joogaan gudaha Itoobiya ay tahay been abuur ay faafinayaan xubno ka tirsan Jabhadda Xoreynta Shacabka Tigray (TPLF), kuwaas oo horey uga hor yimid go’aanka Guddiga Xadaynta Xuduudaha Eritrea iyo Itoobiya, go’aankaas oo ay si rasmi ah u aqbaleen labada dhinac.
Wasiirka wuxuu sheegay in Eritrea aysan u arkin nafteeda inay tahay dhinac ka tirsan heshiiska Pretoria, sidoo kalena aysan rabin inay farageliso arrimaha gudaha ee Itoobiya.
Wuxuu eedeymaha Eritrea lagu xiriirinayo heshiiskaas ku tilmaamay wax la been abuuray, isagoo carrabka ku adkeeyey in dalkiisu uu diiddan yahay in si kasta loogu soo daro khilaafka gudaha ee Itoobiya.
Marka laga hadlayo rabitaanka Itoobiya ee ah inay hesho marin badeed, Cismaan Saalax wuxuu muujiyey yaab ku saabsan sida Itoobiya wali ay ugu taagan tahay arrintaas, taasoo uu ku tilmaamay “fikrad duug ah oo aan suurtagal ahayn.”
Wasiirka wuxuu caddeeyey in Eritrea ay si adag u diiddan tahay isku day kasta oo lagu waxyeelleynayo xasilloonida gobolka ama lagu xad-gudbayo madaxbannaanida dhulkeeda.
Wuxuu beesha caalamka ugu baaqay in cadaadis la saaro Itoobiya si ay uga tanaasusho hamigaas, maadaama uu khatar gelinayo amniga iyo xasilloonida Geeska Afrika.
Wasiirka Arrimaha Dibadda ee Eritrea wuxuu xusay in dowladdiisu ay ka go’an tahay xallinta khilaafaadka gobolka iyadoo la adeegsanayo wada-hadal iyo is-afgarad, isagoo diiday tallaabo kasta oo militari.
Wuxuu hoosta ka xariiqay in Eritrea ay rabto inay xoojiso xiriirka ay la leedahay dhammaan dalalka gobolka, si ay gacan uga geysato nabadda iyo xasilloonida gobolka.
HBN ONLINE TV