Xoghayaha arrimaha dibadda ee Maraykanka Antony Blinken iyo wasiirka difaaca Israa’iil Yaov Gallant ayaa ka wada hadlay dadaallada hadda socda ee lagu dardargelinayo sii deynta la haystayaasha harsan iyo kordhinta gargaarka bini’aadantinimo ee la siinayo rayidka Falastiiniyiinta ee ku sugan marinka Qaza.
Dublamaasiga ugu sarreeya Maraykanka ayaa ku nuuxnuuxsaday muhiimadda ay leedahay in laga digtoonaado sidii looga hortagi lahaa colaadda iyo xiisadda sii xumaanaysa, gaar ahaan Daanta Galbeed iyo Lubnaan.
Isagoo ku celcelinaya in Israa’iil “ay tahay inay qaaddo dhammaan tallaabooyinka suurtagalka ah” si ay uga fogaato waxyeellada rayidka, Blinken wuxuu carrabka ku adkeeyay “ka go’naanta Mareykanka ee horumarinta tillaabooyin la taaban karo oo ku wajahan xaqiijinta mustaqbalka Falastiiniyiinta.”
Israa’iil ayaa duqeymo ka geysatay marinka Qaza tan iyo markii 7-dii Octobar ay Xamaas weerartay, waxaana ku dhintay ugu yaraan 20,057 falastiiniyiin ah oo u badan haween iyo caruur, halka ay ku dhaawacmeen 53,320 kale, sida ay sheegeen mas’uuliyiinta caafimaadka ee deegaankaas.
Duulaanka Israa’iil waxa uu Qaza kaga tagay burbur iyada oo kala bar ka mid ah kaydkii guryaha ee dhulka xeebta ay waxyeelo soo gaartay ama ay burburtay, ku dhawaad 2 milyan oo qofna ay ku barokaceen gudaha dhulka ay dadku ku badan yihiin iyada oo ay jirto cunto yari iyo biyo nadiif ah oo la helo.
Ku dhawaad 1,200 oo Israa’iiliyiin ah ayaa la rumeysan yahay in lagu dilay weerarka Xamaas, halka in ka badan 130 la haystayaal ay weli gacanta ku hayaan Xamaas.
HBN NEWS DESK