Madaxweynaha maamulka Galmudug, Axmed Cabdi Kaariye Qoor Qoor iyo Kusimaha Ergeyga Qaramada Midoobay ee Soomaaliya James Swan iyo wafdi uu hoggaaminayo ayaa maanta kulan xasaasi ah ku yeeshay magaalada Dhuusamareeb ee caasimadda maamulkaas.
Kulanka ayaa looga hadlay xaaladda dalka, gaar ahaan amniga iyo la dagaallanka Al-Shabaab, dastuurka iyo doorashooyinka dalka, waxaana sidoo kale looga hadlay mashaariicda ay QM ka fulineyso deegaanada maamulka Galmudug.
Kusimaha Ergeyga Qaramada Midoobey ee Soomaaliya James Swan ayaa kulanka ka sheegay in Qaramada Madoobay ay si ballaaran u taageereyso dowlad dhiska Soomaaliya, sida hormarinta kaabayaasha dhaqaalaha, amniga, soo celina xasiloonida deegaannada laga saaray Al shabaab, isu-dibaridka iyo xoojinta dagaalka Al shabaab & xaliinta arrimaha khilaafaadka ee ka jiro dalka.
Dhankiisa, Axmed Cabdi Kaariye ayaa sheegay in ay diyaar u yihiin wadashaqeyn xooggan oo ay la yeeshaan Qaramada Midoobey isla markaana uu uga mahadcelinayo deddaalada wadajirka ah ee ay siiyaan maamulka Galmudug iyo guud ahaan Soomaaliya, waxaa uu soo jeediyay in la sii kordhiyo taageerida beesha caalamka ee Soomaaliya,xooggana la saaro Soomaali xasiloon oo barwaaqo ah.
HBN NEWS DESK