Madaxweyne Xasan Sheekh Maxamuud ayaa kulan muhiim ah la qaatay Xildhibaanada Federaalka iyo mas’uuliyiinta kale ee dowladda ku matala Somaliland. Inta uu kulanka socday ayuu ku nuux-nuux saday sida hagar la’aanta ah ee dowladda ay uga go’an tahay ilaalinta madax-bannaanida iyo midnimada dhuleed ee Soomaaliya, gaar ahaan marka la eego go’aankii ay dhawaan gaareen golaha wasiirrada ee in gooni-isku-taaggu khatar ku yahay amniga qaranka.
Madaxweynaha ayaa ku ammaanay mas’uuliyiintan doorka muhiimka ah ee ay ka qaateen ilaalinta midnimada dalka iyo dadka. Wuxuuna ku nuux-nuuxsaday doorka muhiimka ah ee ay ku leeyihiin taageerada dadaallada dowladda ee lagu xoojinayo midnimada qaranka iyadoo ay sii kordhayaan caqabadaha gobolka iyo kuwa gudaha.
Kulanka ayaa hoosta ka xarriiqay mowqifka cusub ee dowladdu ka qaadatay gooni-isu-taagga oo markii ugu horreysay si rasmi ah loo aqoonsaday inuu khatar ku yahay amniga dalka. Go’aankan ayaa muujinaya isbedel ku yimid qaabkii ay dowladda Soomaaliya ula macaamili jirtay Somaliland oo ah gobol ku dhawaaqay in uu ka go’ay Soomaaliya sannadkii 1991-kii, iyadoo tan iyo xilligaasi raadinaysay aqoonsi caalami ah.
Madaxweyne Xasan ayaa khudbadiisa ku celceliyey muhiimadda ay leedahay midnimada iyo in si wadajir ah looga shaqeeyo ilaalinta mustaqbalka Soomaaliya. “Waxaa naga go’an inaan ilaalino madax-banaanida iyo midnimada dhuleed ee Soomaaliya,” ayuu yiri. “Doorka wakiillada ka soo jeedo waqooyi waa udub dhexaadka si aan u xaqiijinno in qarankeennu uu ahaado mid midaysan oo xoog leh ayuu hadalkiisa sii raaciyay.
Mas’uuliyiintii ka qeyb gashay ayaa muujiyay sida ay u taageersan yihiin hindisaha dowladda, waxayna ballan qaadeen inay sii wadi doonaan ka shaqeynta hadafka guud ee Soomaaliya oo ah midnimada iyo xasiloonida. Kulanka ayaa lagu soo bandhigay dadaallada wadajirka ah ee looga baahan yahay in wax looga qabto caqabadaha horyaalla iyo sidii loo kobcin lahaa garaadka guud ee dhammaan gobollada.
HBN NEWS DESK