Milatariga Koonfur Afrika ayaa Arbacadii sheegay in weerar hoobiye ah oo maalin ka hor lagu qaaday mid ka mid ah saldhigyada ay ku leeyihiin bariga Jamhuuriyadda Dimuqraadiga ah ee Congo uu ku dilay laba qof, 20 kalena ay ku dhaawacmeen.
Ciidamada Koonfur Afrika ayaa ku sugan dalka Kongo, waxayna qayb ka yihiin urur-goboleedka Koonfur Afrika ee SADC, si ay dowladda uga caawiyaan la dagaalanka kooxaha mucaaradka ah.
“Afar xubnood oo si xun u dhaawacmay ayaa isbitaal la dhigay, halka inta kale ee soo gaaray dhaawacyada fudud la filayo in dhawaan laga saaro,” ayaa lagu yiri bayaan ka soo baxay ciidamada difaaca qaranka Koonfur Afrika.
Bishii Febraayo weerar kale oo hoobiye ah ayaa lagu qaaday saldhig ay Koonfur Afrika ku leedahay Congo, waxaana ku dhintay labo, saddex kalena waa lagu dhaawacay. Xiligaas madaxweyne Cyril Ramaphosa ayaa ka jawaabay dhaleeceynta mucaaradka ee ahaa in ciidamada Koonfur Afrika ee ku sugan Kongo aysan qalabeyn.
HBN NEWS DESK