Wasiirka Gaashaandhigga Soomaaliya C/qaadir Maxamed Nuur ayaa kulan xasaasi ah la qaatay Ku-simaha Ergeyga Gaarka ah ee Xoghayaha Guud ee Qaramada Midoobay James Swan oo ku saabsan xaaladda kala guurka ee dalka iyo sida ay uga go’an tahay Qaramada Midoobay in ay taageerto hannaankan xasaasiga ah.
Kulanka oo si heer sare ah loo soo agaasimay oo ka dhacay magaalada Muqdisho ayaa waxaa uu hoosta ka xariiqayaa in Soomaaliya iyo Qaramada Midoobay ay iska kaashanayaan xoojinta amniga guud ee dalka, iyadoo ay jiraan caqabado hor leh.
Wasiir Nuur iyo Wakiilka Swan ayaa dib u eegis ku sameeyay xaaladda kala guurka ee Soomaaliya ee dhanka amniga, iyagoo muujiyay horumarka iyo meelaha u baahan taageero caalami ah. Wada-hadalladan ayaa ujeedadoodu ahayd sidii loo xaqiijin lahaa in mas’uuliyadda amniga laga wareejiyo ciidamada caalamiga ah loona wareejiyo ciidamada qaranka Soomaaliyeed si aan kala go ‘lahayn oo wax ku ool ah, taasoo ah tillaabo laf-dhabar u ah waddada Soomaaliya ee xasillooni waarta iyo isku filnaansho.
Wasiir Nuur waxa uu carabka ku adkeeyay sida ay dowladda Soomaaliya uga go’an tahay sare u qaadida awoodaha amniga qaranka, isaga oo xoojinaya muhiimadda ay leedahay sii socoshada iskaashiga iyo taageerada caalamiga ah. “Waxaa naga go’an inaan dhisno Soomaaliya oo nabad ah oo isku kalsoon, waa mid aan leexleexad lahayn, waxaan ka mahadcelineynaa taageerada joogtada ah ee Qaramada Midoobay, waxaana rajeyneynaa inaan sii wadno dadaalladayada iskaashiga ah si aan u gaarno yoolalka amniga,” ayuu yiri Wasiirku.
Ku-simaha Ergeyga Gaarka ah ee Qaramada Midoobay James Swan ayaa mar kale xaqiijiyey sida ay Qaramada Midoobay uga go’an tahay taageeridda Soomaaliya iyada oo loo marayo marxaladdan kala guurka ah. Wuxuu qiray horumarka ay sameeyeen ciidamada ammaanka Soomaaliya, wuxuuna ku celceliyay in Qaramada Midoobay ay diyaar u tahay inay gacan ka geysato tayeynta, qeybsiga kheyraadka, iyo qorsheynta istiraatiijiyadeed.
Wada-hadallada u dhexeeya Wasaaradda Gaashaandhigga Soomaaliya iyo Qaramada Midoobay ayaa ka dhigan qayb muhiim ah oo ka mid ah taageerada beesha caalamka ee socdaalka Soomaaliya ee nabadda iyo xasilloonida.
HBN NEWS DESK