Madaxweynaha Soomaaliya Xasan Sheekh Maxamuud ayaa soo dhoweeyay dadaallada ay wadaan odayaasha dhaqanka Puntland ee ku aadan xalinta khilaafkii doorashada ee u dhaxeeyay madaxda maamul goboleedyada iyo kooxda ka soo horjeeda Khamiista.
Madaxweyne Maxamuud ayaa sidoo kale bogaadiyay go’aanka Madaxweynaha Puntland Siciid Cabdullaahi Deni, kaas oo la filayo inuu wax ka qabtay hubanti la’aanta doorashada. Deni ayaa xalay ku dhawaaqay in maamul goboleedka uu ku soo laaban doono qaab doorasho dadban, taasoo ay soo jeedinayeen mucaaradka, Isimmada Puntland iyo kuwa SSC khaatumo toddobaadyadii la soo dhaafay.
Madaxweyne Xasan Sheekh Maxamuud ayaa xusay in go’aannada Madaxweyne Deni iyo ka qeyb galka odayaasha ay yihiin tallaabooyin kor u qaadaya xasiloonida iyo horumarka siyaasadeed ee Puntland iyo guud ahaan Soomaaliya.
Deni oo khudbad ka jeediyay munaasabad ka dhacday xarunta madaxtooyada dowlad goboleedka Puntland, ayaa muujiyay sida ay u adag tahay in la hakiyo hanaanka doorashada hal qof iyo hal cod. Si kastaba ha ahaatee, marka la eego duruufaha jira, ayuu dib ugu laabtay hannaankii doorashada dadban, ee ay hoggaamiyeyaasha beeluhu soo xuli jireen xubnaha baarlamaanka ee gobollada.
Bishii hore, guddiga doorashada Puntland ayaa soo bandhigay jadwalka doorashada hal qof iyo hal cod, qorshahaas oo uu si weyn u taageeray madaxweyne Siciid Deni, mucaaradka ayaa ku gacan seyray, waxayna ku tilmaameen inuu yahay qorshe madaxweyne Deni uu ku doonayo inuu xilka loogu kordhiyo. Waxay ku doodeen in doorasho hal qof iyo hal cod ah la qabto dhowr bilood gudahooda aysan macquul ahayn.
HBN NEWS DESK