Dhacdo naxdin leh oo ka dhacday xadka u dhaxeeya Kenya iyo Soomaaliya (Mandera iyo Baladxaawo) ugu yaraan hal qof ayaa ku dhintay, dhowr askari oo booliis ahna waa ay ku dhaawacmeen qarax dhulka la galiyay.
Wararka ayaa sheegaya in Gaari Dameer oo marayay meel u dhow xuduudka uu si lama filaan ah haleelay Miino dhulka lagu aasay, waxaana qaraxa uu geystay khasaare badan.
Dhacdadan ayaa daba socota caqabad kale oo dhanka ammaanka ah oo ka dhacday Mandheera, halkaasoo Al-shabaab ay sheegatay mas’uuliyadda weerarro xiriir ah oo lagu qaaday kaabayaasha isgaarsiinta toddobaad ka hor. Xoogaga weerarka soo qaaday ayaa si gaar ah u beegsaday tuulada Fincharo, oo ku taal meel u dhow magaalada Ceelwaaq ee ismaamulka Mandera.
Maamulka ayaa si dhab ah u baaraya qaraxii dhawaan dhacay, iyadoo tuhunka hore uu tilmaamayo ku lug lahaanshaha Al-Shabaab. Dhacdadani waxa ay hoosta ka xariiqday khatarta amni ee joogtada ah ee soo food saartay bulshooyinka ku dhaqan deegaannada xuduudka, iyada oo ku baaqday in la kordhiyo feejignaanta iyo dadaallada iskaashiga ah ee wax looga qabanayo loogana hortagayo khatarahaas.
HBN NEWS DESK