Madaxweynaha Soomaaliya Xasan Sheekh Maxamuud ayaa magaalada London ee dalka Ingiriiska u tagay marti gelinta Shirka Sugnaanta Cunnada Adduunka oo uu la yeelanayo Ra’iisul Wasaaraha UK Rishi Sunak, Imaaraadka Carabta, Hay’adda Maalgelinta Carruurta ee CIFF iyo Hay’adda Bill & Melinda Gates Foundation.
Shir madaxeedkan oo lagu wado in uu ka dhaco magaalada London ayaa waxaa isugu imaanaya madaxda kala duwan, kooxaha gargaarka, saynisyahano ku howlan hindisayaasha cilmi baarista caalamiga ah, khubarada cimilada iyo cunnada.
Shir-madaxeedkan ayaa lagu soo bandhigi doonaa kulamo kala duwan oo diiradda lagu saarayo hab-dhaqannada cusub ee beeraha, beeralayda u adkaysanaysa cimilada, iskaashiga caalamiga ah ee qaybsiga kheyraadka, iyo taageerada dalalka sida Soomaaliya oo kale ah, kuwaas oo safka hore kaga jira dagaalka sugnaanta cunnada sababo la xiriira juqraafi ahaan.
Sida laga soo xigtay Qaramada Midoobay, falanqayntii ugu dambaysay ayaa muujinaysa in intii u dhaxaysay bilihii April iyo June 2023, ku dhawaad 6.6 milyan oo qof oo ku nool Soomaaliya ay la kulmeen heerar sare oo cunto yari ah.
Wasiirka Horumarinta Caalamiga ah ee UK, Andrew Mitchell, ayaa yiri, “Maanta waxaan daah-fureynaa warqadda cad ee horumarinta caalamiga ah ee UK, taas oo dejin doonta aragtida fog ee wax ka qabashada caqabadaha caalamiga ah ee muhiimka ah, oo ay ku jiraan ka hortagga iyo daweynta iyada oo loo marayo iskaashi cusub iyo ilo dhaqaale. .
Ilaa 100 milyan oo gini oo maalgalin bini’aadantinimo ah ayaa lagu siiyaa wadamada ay sida xun u saamaysay cunto yarida, oo ay ku jiraan Soomaaliya,Ethiopia, Sudan, South Sudan iyo Afganistan, iyo wadamada ay saameeyeen dhacdooyinka cimilada la xiriiraa, sida Malawi.
Daadad ka dhashay roobab xooggan oo billowday horraantii Oktoobar ee Soomaaliya ayaa sababay dhimashada 50 qof iyo barakaca in ka badan nus milyan kale, sida ay ku warrantay hay’adda musiibooyinka qaranka ee dalka.
Hay’adda ka hortagga masiibooyinka Soomaaliya ayaa sheegtay in roobabka dabeylaha wata ay sidoo kale sababeen dhul go’ iyo daadad ka dhashay roobabka ka da’ay gobollada dalka Soomaaliya, kuwaasi oo baabi’iyay dalagyo iyo xoolo.
HBN NEWS DESK