Soomaaliya ayaa si rasmi ah ugu dhawaaqday in ay u sharaxan tahay kursiga aan joogtada ahayn ee Golaha Ammaanka ee Qaramada Midoobay, sanadka 2025-2026. Ku dhawaaqista ayaa ka tarjumaysa hamiga Soomaaliya ee ah in ay kaalin muuqata ka qaadato masraxa caalamiga ah oo ay gacan ka geysato dadaallada nabadda iyo amniga adduunka.
Kursigan gaarka ah ee ay Soomaaliya ku tartamayso ayaa ah mid loo qoondeeyay mid ka mid ah dalalka Afrika, gaar ahaan mid ku yaalla Bariga Afrika. Dowladda Soomaaliya ayaa aad u daneyneysa in ay Qaramada Midoobay u matasho kursigaan, waxaana ay Midowga Afrika ka dooneysaa in ay ogolaato musharaxnimadeeda, iyadoo rajo laga qabo go’aanka lagu wado inuu dhaco 21-ka bishan.
War qoraal ah oo uu soo saaray ergada Soomaaliya u qaabilsan Qaramada Midoobay, ayuu dalku ku muujiyay sida ay uga go’an tahay in uu hormuud u noqdo horumarinta ajendaha nabadda iyo amniga Afrika ee UNSC. Soomaaliya waxay kaloo ku nuuxnuuxsatay sida ay uga go’an tahay ilaalinta mabaadi’da iyo axdiyada Qaramada Midoobay si loo dhiso nidaam caalami ah oo nabadoon, oo xasilloon.
Doorashada kursigan aan joogtada ahayn, oo ka mid ah shanta guud, ayaa lagu wadaa inay dhacdo inta lagu guda jiro kalfadhiga 78-aad ee Golaha loo dhan yahay ee Qaramada Midoobay bartamaha sanadka 2024-ka. Wadamada ku guulaysta waxay ku biiri doonaan UNSC muddo labo sano ah laga bilaabo Janaayo 2025 ilaa 2026, iyagoo matalaya gobolo kala duwan, oo ay ku jiraan Afrika, Asia-Pacific, Latin America iyo Caribbean, iyo laba kursi oo ku yaal Galbeedka Yurub iyo dalal kale.
Hadda, qaaraddu waxay leedahay saddex kursi oo aan joogto ahayn oo ay haystaan Mozambique, Algeria, iyo Sierra Leone. Si kastaba ha ahaatee, shanta xubnood ee joogtada ah – Maraykanka, Ruushka, Shiinaha, Boqortooyada Ingiriiska iyo Faransiiska – waxay sii haysanayaan awoodda diidmada qayaxan ee go’aamada, iyada oo aan loo eegin taageerada dalalka kale ee xubnaha ka ah.
Sidoo kale, go’aanka Soomaaliya ay ugu tartamayso kursigan ayaa wuxuu daba socdaa heshiiskii ay Tanzania la gashay inay iska kaashato arrimaha caalamiga ah, kaddib markii ay Soomaaliya ka quusatay Tanzania doorashada madaxweynaha baarlamaanka adduunka oo uu ku guuleystay guddoomiyaha baarlamaanka Tanzania.
HBN NEWS DESK