Dowladda Federaalka Soomaaliya DFS ayaa difaacday ciidamada amniga ee sida weyn loogu daadiyay magaalada Mogadishu, iyadoo sheegtay in tallaabooyinkaas looga gol leeyahay ilaalinta badqabka shacabka iyo ka hortagga qalalaase la xiriira bannaanbaxyo ay qorsheynayaan mucaaradka.
War-saxaafadeed ay soo saartay Wasaaradda Warfaafinta Soomaaliya ayaa lagu sheegay in dowladda federaalku ay taageersan tahay xuquuqda dastuuriga ah ee isu imaatinka nabadeed iyo ka qaybgalka siyaasadda, iyadoo xustay in garoonka Koonis loo oggolaaday goobta rasmiga ah ee lagu qabanayo dibadbaxa.
Si kastaba ha ahaatee, masuuliyiintu waxay ku eedeeyeen qabanqaabiyeyaasha mucaaradka inay qorsheynayeen bannaanbaxyo ka dhaca 22 goobood oo kala duwan oo ku yaalla Muqdisho, arrintaas oo dowladda ku tilmaantay isku day lagu carqaladeynayo amniga iyo kala dambeynta magaalada halkii ay ka ahaan lahayd sida ay hadalka u dhigtay dibadbax nabadeed oo shacabka ah.
Dowladdu waxay sidoo kale walaac ka muujisay warar sheegaya in rag hubeysan oo lala xiriirinayo kooxaha mucaaradka ay ku sugan yihiin qaybo kala duwan oo caasimadda ah, oo ay ku jiraan deegaanno ay dad rayid ahi ku badan yihiin.
Masuuliyiintu waxay ka digeen in bannaanbaxyada qorsheysan ee soconaya shan maalmood iyo hadallada siyaasadeed ee sii kululaanaya ay khatar gelin karaan shacabka, carqaladeyn karaan adeegyada muhiimka ah, islamarkaana ay xasillooni darrro ka abuuri karaan magaalada.
Qoraalka dowladda ayaa sidoo kale lagu dhaliilay hadallo loo nisbeeyay Madaxweynihii hore ee Soomaaliya Shariif Sheekh Axmed, iyadoo lagu sheegay in hadallada xusaya iska horimaadyo hubeysan oo hore ay kordhin karaan xiisadaha siyaasadeed.
Kooxaha mucaaradka ayaa dowladda ku eedeeyay inay xaddideyso isu socodka dadka isla markaana ay caburinayso bannaanbaxyada la qorsheeyay, eedeymahaas oo dowladda aysan si toos ah uga jawaabin.
Dowladda ayaa sheegtay in ciidamada amniga lagu amray inay muujiyaan dulqaad, xirfad iyo ixtiraam xuquuqda aadanaha iyagoo ilaalinaya amniga guud.
HBN ONLINE TV