Madaxweynaha Somaliland Muuse Biixi Cabdi, mar kale soo hadal qaaday dhaqan gelinta hishiiski is-af-garadka ahay ee ay kala saxiixdeen dowladda Itoobiya horraantii sanadkan, isla markaana sheegay xukumadiisa ay ka go’an tahay in hishiiskaas loo beddelo mid rasmi ah.
Biixi ayaa warkaan ka sheegay munaasabadda xuska 26 Juun, markaas oo uu la hadlayay dadweynihii ka soo qeyb galay, waxaa uu carabka ku adkeeyaay in labada dhinac ay ka go’antahay in ay fuliyaan heshiiska oo uu sheegay in uu Somaliland u horseedi doono aqoonsi.
Muuse Biixi oo jeediyay khudbad dheer oo taabaneysay dhinacyo badan, ayaa madaxweyne Xasan Sheekh ku eedeeyay in uusan marnaba diidaneyn in Itoobiya lala galo hishiiskan badda, balse uu ka hor jeedo in Somaliland ay ku lug yeelato, sida uu hadalka u dhigay, isla markaana aysan dhag jalaq u siin doonin.
Xasan Sheekh Maxamuud, oo dhankiisa hadal ka jeediyay dabaaldegga 26 Juun ee magaalada Muqdisho, ayaa hoosta ka xariiqay in aanu kasoo horjeedin in reer Somaliland ay heshiis galaan, laakiin ay dowladda Soomaaliya diidan tahay waa sida uu yiriye in la bixiyo dhul Soomaaliyeed, taasoo khatar culus ku ah mustaqbalka.
Heshiiska Somaliland iyo Itoobiya ayaa gobolka ka abuuray xiisad dibulumaasiyadeed oo culus oo u dhexeysa Muqdisho & Adis Ababa, isla markaana hishiiskaas ay ka hor yimaadeen ururo caalami ah iyo dalal badan oo caalamka ku yaal, xilli Biixi iyo Abiy Axmed ay ku adkeysanayan meel marintiisa.
HBN NEWS DESK