Wararka ka imaanaya gobolka Sanaag ayaa sheegaya in duqeyn culus lagu beegsaday gaari uu saarnaa Nabadoon caan ah, xilli uu marayay deegaanka Jinacyo ee hoos taga degmada Ceelbuh ee gobolka Sanaag.
Goobjoogayaal ayaa xaqiijiyay in duqaynta lagu dilay Caaqil Cumar Cabdullaahi Cabdi iyo nin kale oo aan weli la aqoonsan, kuwaas oo ku safrayay gaariga la weeraray oo marayey inta u dhexeysa Ceelbuh Iyo Badhan.
Warar horudhac ah ayaa sheegaya in laamaha ammaanka Puntland, oo ay ku jiraan qaybaha CID-da ay gaareen degmada Ceelbuh, halkaas oo ay ka bilaabeen baaritaanno ku saabsan dhacdadan.
Ilaa iyo hadda, ma jirto faahfaahin rasmi ah oo ka soo baxday cidda ka dambeysay weerarkan, balse duqayntan ayaa lagu tilmaamay inay tahay tii ugu horreysay ee si toos ah uga dhacda dhulka bannaan ee bartamaha gobolka Sanaag.
Isha ku haay HBN ONLINE TV