Iyada oo lagu wado maalmaha soo socda in la qabto markii 2-aad doorashada ku celiska ah ee Galmudug ayaa waxaa tabasho weyn ka muujiyey Ururka Siyaasadeedka Towfiiq oo laga reebay in ka qeyb-noqdo xubnaha ka soo muuqday ka qeyb-galka doorashaasi.
Sheekh Maxamed Shaakir Cali Xasan oo ah Guddoomiyaha Towfiiq, ayaa sheegay in ururkiisu doonayo inuu ka qeyb galo doorashada ku-celiska ah ee Galmudug, kaddib markii guddiga doorashooyinka uu ka reebay liiska ururrada tartamaya.
Isaga oo shir jaraa’id qabanayey ayuu sheegay Sheekh Shaakir in Towfiiq doorashada Galmudug muhiimad weyn siinayo, wuxuuna muujiyay niyad-jabka dhalan kara in ururkiisa laga reebo doorashada, gaar ahaan iyadoo Towfiiq uu hore uga mid ahaa dhinacyadii dalbaday in doorashadii hore dib loogu laabto.
Sidoo kale, Wuxuu Madaxweyne Xasan Sheekh Maxamuud ka dalbaday in dib loo eego go’aanka ururka looga reebay doorashada, isla markaana Towfiiq lagu daro ururrada ka qeybgalaya doorashada ku-celiska ah, ayna diyaar u yihiin ka qeybgalka doorashada ku celiska ah si waafaqsan sharciga iyo habraacyada doorashooyinka.
Doorashada maamulka Galmudug ayaa loo qorsheeyay 30-ka September 2026. Guddiga Doorashooyinka Soomaaliya ayaa 13-kii bishaan September 2026 shaaciyay liiska 12-ka urur ee loo oggolaaday inay ka qeyb galaan doorashada ku-celiska ah ee Galmudug, waxaana liiskaas ka maqnaa Towfiiq. Guddiga ayaa sheegay in ururrada la qoray ay soo gudbiyeen liisaska musharraxiintooda, iyadoo muddadii soo gudbinta liisaskuna xirmatay.
Arrinta ka dhalatay ka maqnaanshaha Towfiiq ayaa sii kordhisay doodda ku saabsan ka qeybgalka ururrada siyaasadeed ee doorashada ku-celiska ah ee Galmudug, iyadoo maalmo kooban ay ka harsan yihiin doorashada loo qorsheeyay 30-ka September 2026.
HBN Online Tv