Ciidanka cirka ee Ukraine ayaa maanta daboolka ka qaaday in difaacyadooda cirka ay soo rideen 51 ka mid ah 92 diyaarado drone ah oo Ruushku ku weerarray gobolo kala duwan, waxaana tani ku soo aadaysaa iyadoo taliyeyaasha ciidamada Faransiiska iyo Ingiriiska ay booqdeen Kyiv si ay taageero ugu muujiyaan ciidanka Ukraine.
Kyiv ayaa bayaan ku sheegtay in 31 diyaarado drone oo dheeraad ah la leexiyay, iyadoo la adeegsanayo farsamooyinka dagaalka elektaroonigga ah si loo joojiyo ama loo carqaladeeyo diyaaradahaas. Waxay intaas ku dartay in khasaare la xaqiijiyay in uu ka dhacay gobollada Kyiv, Jitomyr, Sumy iyo Dnipropetrovsk.
Dhinaca siyaasadda, Wasaaradda Difaaca Faransiiska ayaa sheegtay in taliyeyaasha ciidamada Faransiiska iyo Ingiriiska ay u safreen Kyiv si ay ula kulmaan saraakiisha Ukraine, booqashaduna ay ahayd mid lagu falanqeynayo baahiyaha iyo yoolalka ciidanka Ukraine si loo taageero muddo fog. Wasaaraddu ayaa sidoo kale sheegtay in xoojinta ciidanka Ukraine ay tahay dammaanad muhiim ah oo amni u ah nabad waarta oo dalkaasi helo.
Madaxweynaha Mareykanka Donald Trump, oo xilka la wareegay bishii Janaayo ayaa ballanqaaday inuu dagaalka joojin doono 24 saacadood gudahood, ayaa hadda raadinaya inuu dhexdhexaadiyo heshiis lagu soo afjaro colaadda Ruushka iyo Ukraine.
Washington ayaa toddobaadkii hore ku dhawaaqday inlaba heshiis xabbad-joojin ah oo ay la galeen Ruushka iyo Ukraine, mid ka mid ah ayaa dhigaya in la joojiyo weerarrada lagu hayo kaabayaashooda tamarta.
Isla arrimahan, Wasiirka Arrimaha Dibadda ee Ukraine, Andriy Sepha, ayaa sheegay in dalkiisu aqbalay dalabka Mareykanka ee nabadda, isagoo ugu baaqay in cadaadis la saaro Moscow oo weli sii wada weerarrada Kyiv, sida hadalka uu u dhigay.
Wuxuu warbaahinta u sheegay in caqabaddu aysan ahayn Kyiv oo aqbashay dalabka Mareykanka, balse ay tahay Moscow oo ka caga-jiideysa nabadda una sii socota weerarada ay ku heyso dalkiisa.
Tan iyo 24-kii Febraayo 2022, Ruushka wuxuu dagaal militari ku qaaday dalka deriskiisa ah ee Ukraine, isagoo ku xiray joojinta weerarka in Ukraine ay ka tanaasusho xubinnimada ururrada difaaca reer Galbeedka, taasoo Ukraine u aragto faragelin arrimaheeda gudaha ah.
HBN ONLINE TV