Hay’adaha gargaarka bini’aadantinimo ayaa sheegay in Soomaaliya ay u baahan doonto boqolaal milyan oo Doollar oo maalgelin ah sannadkan bilowga ah 2026, si wax looga qabto baahiyaha malaayiin qof oo ay saameeyeen abaar, colaadaha iyo saameynta dhaqaale, sida ku xusan Qorshaha Baahiyaha iyo Ka-jawaabta Bini’aadantinimo ee 2026 (HNRP).
Lacagta la sheegay in Soomaaliya ay u baahan tahay oo ah mid aad xadigeedu u badan yahay marka loo eego dadka gargaarka la gaarsiinayo ayaa gaaraysa $852 Milyan oo Doollar, waxaana qiimaha intaasi la eg ee lacagta ah looga jawaabi doonaa xaalada adag ee ka jira dalka oo ay abaartu ugu horeyso.
Qorshuhu wuxuu qiyaasayaa in 4.8 milyan oo qof ay u baahan doonaan gargaar bini’aadantinimo sannadka soo socda, taas oo ah hoos u dhac 20% marka loo eego 2025. Hoos u dhacaas badankiisu wuxuu ka dhashay adkeynta shuruudaha qiimeynta, halkii ay ka ahaan lahayd horumar dhab ah oo xaaladaha ah. Hay’adaha gargaarku waxay doonayaan inay gaaraan 2.4 milyan oo qof, iyadoo 1.6 milyan loo aqoonsaday kuwa mudnaanta 1-aad leh ee wajahaya baahiyaha ugu daran.
Ka-jawaabistu waxay diiradda saari doontaa badbaadinta nolosha iyo dhimista cudurrada iyo dhimashada la xiriirta qalalaasaha, iyadoo la adeegsanayo gargaar degdeg ah, ku dhisan mabaadi’da bini’aadantinimo, isla markaana la xisaabtami karo, sida uu sheegay qorshuhu. Xaddidaadaha maalgelinta awgeed, ka-jawaabistu waxay dabooli doontaa oo keliya ku dhowaad kala bar dadka u baahan gargaarka.
La-hawlgalayaasha bini’aadantinimada waxay qorsheynayaan inay xoogga saaraan 21 degmo oo mudnaan leh, kuwaas oo ka mid ah 64 degmo oo dalka oo dhan laga shaqeeyo. Gargaar lacageed oo ujeeddooyin badan leh ayaa la filayaa inuu door muhiim ah ka ciyaaro xaaladaha adag ee jira. Hay’aduhu waxay ka digeen in maalgelin joogto ah oo dabacsan ay si weyn muhiim u tahay si looga hortago in xaaladdu sii xumaato, gaar ahaan maadaama la filayo in abaartu kasii darto xilliga Jilaal
HBN ONLINE TV