Soomaaliya iyo Jabuuti ayaa maanta kala saxiixday heshiisyo cusub oo lagu xoojinaayo amniga labada dal, Geeska Afrika iyo Badda Cas. Heshiisyadan ayaa waxaa magaalada Muqdisho ku kala saxiixday Wasiirka Arrimaha Dibadda Soomaaliya Cabdisalaan Cabdi Cali iyo dhiggiisa Jabuuti, Cabdulqaadir Xuseen Cumar.
Labada wasiir ayaa sheegay in iskaashigan uu salka ku hayo xoojinta amniga gobolka iyo wada-shaqeynta siyaasadeed, iyadoo la qorsheeyay in lixdii biloodba mar dib u eegis lagu sameeyo si wax looga qabto xaaladaha soo kordha ee gudaha iyo dibadda.
Intii lagu guda jiray kulanka, waxaa si qoto dheer looga hadlay sida la tilmamay arrimaha xasilloonida gobolka, iskaashiga amniga iyo danaha caalamiga ah ee labada dal wadaagaan.
Sidoo kale, heshiisyadu waxay dhisayaan sida hadalka loo dhigay hannaan rasmi ah oo loogu talagalay wada-tashiyo joogto ah, taas oo xoojinaysa iskaashiga diblomaasiyadeed iyo doorka labada dal ee heer gobol iyo caalami.
Labada wasiir ayaa carrabka ku adkeeyay muhiimadda ay leedahay iskaashi dhow oo horseeda nabad, horumar iyo barwaaqo ka hanaqaada Geeska Afrika.
Dhanka kale, Wasiirka Arrimaha Dibadda Jabuuti Cabdulqaadir ayaa maanta la kulmay Wasiiru-dowlaha Difaaca Soomaaliya Cumar Cali Cabdi iyo saraakiil sare oo ka tirsan Ciidanka Xoogga Dalka. Kulanka ayaa lagu gorfeeyay xoojinta iskaashiga amniga iyo dardar-gelinta howlgal wadajir ah oo lagula dagaallamayo Alshabaab.
Jabuuti waxay ka qeyb tahay howlgalka AUSSOM, waxaana ciidankeeda Soomaaliya loogu yaqaannaa “Hiil Walaal,” magacaas oo ka tarjumaya taageerada iyo walaaltinimada shacabka Soomaaliyeed ay u hayaan.
Soomaaliya iyo Jabuuti oo ay ka dhaxeeyaan xiriir walaaltinimo, dhaqan iyo taariikheed qoto dheer, ayaa ku celiyay go’aankooda ku aaddan sii xoojinta iskaashiga iyo wada-shaqeynta soo jireenka ah.
HBN ONLINE TV