Madaxweynaha Somaliland, Cabdiraxmaan Maxamed Cirro, ayaa soo saaray wareegto mamnuucaysa wax kasta oo tacadi ah ama dhibaato ah oo loo geysto dadka ajaanibka ah ee jooga deegaannada Somaliland, gaar ahaan dadka Itoobiyaanka ah ee maalmihii la soo dhaafay laga raafayey Hargeysa.
Madaxweyne Cirro ayaa si gaar ah u xusay in xiriirka wanaagsan ee Somaliland la leedahay dalka Itoobiya uu yahay mid aan labada dhinac kala maarmin, isagoo caddeeyey in wax farin-galin ah oo ay shacabka ama shaqaalaha xukuumaddu ku yeeshaan joogitaanka dadkaasi aysan jirin, isla markaana isagu masuul ka yahay ilaalinta nabadgalyadooda.
“Dadka Itoobiya halkaan waa yimaadaan in qolo gaar ah, gaar loo loola baxo oo la dhibaateeyo waa mamnuuc. Dadka reer Itoobiya iyo Somaliland ma kala maarmaan. Dhamaan dadka Dowladda u shaqeeya iyo masuuliyiinta waa mamnuuc. Nabadgalyada ajnabiga anaa ka masuul ah.” ayuu yiri Madaxweyne Cirro.
Wareegtadan ayaa muujinaysa isbedel cusub oo ku yimid bartilmaameedsigii dadka Itoobiyaanka ah ee Somaliland jooga, iyadoo la adkaynayo in aan la dulmin ama waxyeello loo geysan qof kasta oo deggan gudaha Somaliland.
Arrintan ayaa ku soo aadaysa xilli deegaanno badan oo Somaliland ah lagu arkay ciidamada ammaanka oo raaf ku sameynayey dad lagu sheegay inay Itoobiya ka soo galeen, kuwaas oo lagu eedeeyey sida hadalka loo dhigay joogitaan sharci darro ah gudaha gobolka
HBN ONLINE TV