Ugu yaraan 10 qof ayaa ku geeriyootay ku dhawaad 20 kalana waa ay ku dhaawacmeen shil baabuur oo maanta ka dhacay duleedka magaalada Qabribayax ee Dawladda Deegaanka Soomaalida.
Shilka ayaa waxaa yimid ka dib markii ay isku dhaceen laba baabuur oo kala ahaa mid xamuulka qaada iyo mid qaadle ah.
Dadka ku dhintay iyo kuwa dhaawacmay shilkan ayaa u badnaa laba qoys, waxaana laga xusi karaa hooyo & afar caruur ah oo ay dhashay oo hooyadii iyo laba ilmood ay geeriyoodeen halka labadii ilmood ee kale uu dhaawac culus soo gaaray.
Maxamed Abiib oo ka mid ah dadka deegaanka Qabribayax ayaa u sheegay HBN TV in shilku uu ka dhacay meel hal kiilo mitir u jirta magaalada, isla markaana loo aanaynayno sababta shilka waddada oo burbursan iyo gawaarida oo xoog ay u wadaan wadayaashu.
HBN ONLINE TV